Þetta er að fjara út og núna er stóra spurningin hvort að Ytri nær að smjúga fram úr Eystri á lokametrunum. Það er ekki útilokað, þar hefur gengið heldur betur að undanförnu og bilið er að minnka. En það kemur í ljós og skiptir kannski ekki öllu máli. Eystri er miklu betri en í fyrra, Ytri er miklu lakari en í fyrra. En í báðum veiðist vel.
Vikutölurnar eru sem sagt komnar og við kíkjum á þær svona eins og af gömlum vana þó að mesta spennan sé búin. Eins og einhver sagði, laxarnir sem barið er á þessa daga og vikur eru búnir að vera lengi í ánni og lítið hefur bæst í hópinn í all nokkurn tíma.
Við skulum renna yfir lista sem sýnir heildartöluna síðasta miðvikudagskvöld, í sviga er lokatala síðasta sumars og síðan vikutalan og þar má sjá að þetta er orðið ansi þreytt víða. En við heyrðum af einum góðum punkti í vikunni. Norður- og Norðausturlandið er undirlagt af smálaxabresti. Uppúr stendur Miðfjarðará eins og stundum áður. Þó að hún sé töluvert undir lokatölu síðasta sumars þá hefur hún samt sem áður gefið meira heldur en nágrannaárnar Víðidalsá, Vatnsdalsá, Laxá á Ásum, Blanda og Hrútafjarðará til samans!
En hér er listinn:
Eystri Rangá 3617 (2143) – 131
Ytri Rangá 3445 (7451) – 268
Miðfjarðará 2509 (3765) – 149
Þverá/Kjarrá 2455 (2060) – 11
Norðurá 1692 (1719) – 82
Haffjarðará 1545 (1167) – 43
Langá 1442 (1701) – 47
Selá 1315 (937) – 32
Urriðafoss 1284 (755) – 27
Laxá í Dölum 971 (871) – 92
Elliðaárnar 953 (890) – 21
Laxá í Kjós 903 (860) – 49
Blanda 866 (1433) – 5
Affall 759 (193) – 66
Laxá á Ásum 670 (1108) – 26
Laxá í Leirársveit 661 (624) – 26
Hofsá 650 (589) – 21
Haukadalsá 603 (503) – 21
Laxá í Aðaldal 590 (709) – 12
Hítará 579 (494) – 28
Víðidalsá 535 (781) – 25
Flókadalsá 456 (423) – 16
Vatnsdalsá 441 (714) – 27
Jökla 425 (355) – 17
Þverá í Fljótshl 483 (448) – 14
Stóra Laxá 380 (590) – 20
Straumfjarðará 328 (352) – 17
Þarna eru ágætis vikutölur. Miðfjarðará, Affallið, Laxá í Dölum, Norðurá. En annars er þetta haustlegt. Það gæti glæðst í blálokin ef að koma frábær skilyrði, því eins og Pétur Pétursson sagði þá er oft fínasta haustveiði þó að lítið sé af laxi. Bara ef að skilyrði eru rétt!
