Kampakátur veiðimaður með fallegan smálax í opnun Sunnudalsár. Mynd frá Streng

Líklega næst síðasta opnun Laxveiðiár á Íslandi (Vatnsá opnar 20.7) var opnun Sunnudalsár í Vopnafirði, en á hádegi í dag hafði verið veitt í ánni í tvo og hálfan dag. Veiði hefur verið afar lífleg.

Sunnudalslaxi sleppt aftur að hittingi loknum. Mynd frá Streng.

Ingólfur Helgason hjá Streng, sem hefur með umsjón Sunnudalsár að gera, sagði að 18 laxar væru komnir á land úr ánni eftir tvo og hálfan dag, „það er mjög líflegt og laxinn víða í ánni,“ sagði Ingólfur. Sunnudalsá er þverá Hofsár og er nokkuð myndaleg að burðum. Kaldari þó en Hofsá. Áin var í fyrsta skipti seld sem ein eining í fyrra og þótti heppnast vel, 118 laxar veiddust á aðeins tvær stangir og þá eins og nú fór veiðin mjög líflega af, sem kom mönnum dálítið í opna skjöldu því að áin hefur yfirleitt verið talin síðsumarsá

Þá hefur lífleg veiði hefur verið í Selá og Hofsá síðustu daga. Smálax byrjaður að sýna sig, en stórir fiskar enn að ganga og veiðast lúsugir, m.a. 90 cm dólgar í báðum ánum.

Jón Magnús Sigurðarson með 90 cm hæng úr hylnum „Bone Marrow“ í Hofsá nú í vikubyrjun. Mynd frá Streng.

Eins og fram hefur komið hefur gæðum landsins hvað laxagöngur og veiði verið misskipt milli landshluta. Vopnfirðingar, utan þeir sem eiga aðild að Vesturdalsá, hafa horft á nóg af vatni renna fram hjá. Selá var opnuð seinna en venjulega, afar vel veiddist en svo var áin svo gott sem hvíld í viku áður en byrjað var aftur að eiga við hana. Hofsá byrjaði fyrr og fór mjög rólega af stað. Að undanförnu hefur hins vegar verið mjög líflegt í ánni. Þessar fregnir fengust frá veiðiklúbbnum Streng sem hefur umsjón með báðum ánum.