Frændurnir Haraldur Eiríksson og Reynir Þrastarson hafa endurleigt leigusamning sinn við Hítará til sumarsins 2030 og hefur nú samstarfið staðið um nokkurt árabil. Áin, sem er rekin sem sjálfbær, hefur komið vel út úr síðustu sumrum sem flest hafa verið allt frá slök til léleg þegar litið er til landsins alls.
Hér eru staddir Þórólfur Árnason VH, Haraldur Eiríksson leigutaki, Nökkvi Páll Jónsson formaður VH og Reynir Þrastarson leigutaki. Mynd er merkt Reyni.
Haraldur Eiríksson skrifar eftirfarandi í FB færslu: „Þetta hefur verið farsælt samstarf. Ekki síst fyrir þær sakir að áin hefur fengið sinn skerf af mótlæti en sumarið 2018 varð berghlaup úr Fagraskógarfjalli sem breytti farvegi árinnar og myndaði stórt lón í miðjum Hítardal sem fengið hefur nafnið Bakkavatn. Þangað er ekki fiskgengt, því foss í nýjum farvegi Hítarár útilokar lax frá því svæði árinnar sem áður var kennt við Hítará II. Þess í stað gengur hann upp að umræddum fossi á móts við skriðuendann.
Seiðasleppingar á vatnasvæðinu heyra sögunni til. Hítará og hliðarár hennar eru því að öllu leiti sjálfbærar, en lögð hefur verið áhersla á góða umgengni, sleppingar á veiddum laxi og færslu laxapara á ófiskgeng svæði til hrygningar. Með þessum aðgerðum sér áin nú um sína laxaframleiðslu með sjálfbærum hætti. Þrátt fyrir það hefur veiðin verið yfir 30 ára meðaltali frá því við frændur tókum við keflinu og gaf í fyrra um 500 laxa.
Merkjanlegar breytingar eru veiðinni í Hítará eftir hamfarirnar í Fagraskógarfjalli. Veiðin í neðanverðri ánni hefur aukist til mikilla muna en fjórir af bestu veiðistöðunum í fyrra eru á neðsta hluta árinnar. Virðist sem hrygningarskilyrði laxa í neðanverðri ánni hafi batnað til mikilla muna eftir tilkomu Bakkavatns og gæti vatnshiti spilað þar inn í. Virðist því sem þetta grunna vatn hiti ána á leið sinni til sjávar. Slíkt eru þó aðeins getgátur og frekari rannsókna þörf.“
Vangaveltur Haraldar um að nýja vatnið geti staðið fyrir aukinni framleiðslu á laxi í neðanverðri ánni eru athyglisverðar, því að vötn, sérstaklega grunn vötn, geta haft mikil áhrif á vatnshitastig. Þetta er því álitleg kenning, þó að rétt sé hjá Haraldi að slíkt þyrfti að rannsaka til að fullyrða.
