Fyrsta veiðivikan í Veiðivötnum kláraðist þann 25.júní og eftir vikuveiði var búið að færa til skráningar 2635 fiska, 1155 urriða og 1480 bleikjur. Þetta kemur fram á þeim ágæta vef Veiðivatna veidivotn.is.
Aflahæsta vatnið er Snjóölduvatn með 618 fiska, en vatnið er fyrst og fremst bleikjuvatn og bleikjur í aflanum 606. Fyrir vikið er meðalþyngd lítil, aðeins 0,66 pund og spurning hvort huga þurfi að grisjun.
Litlisjór er í öðru sæti og urriðavatn, 430 skráðir fiskar í vatninu eru allt urriðar, stærst 9 pund og meðalþyngd 2,59 pund. Nýjavatn er í þriðja sæti með 416 fiska en það er næstum hreint bleikjuvatn eins og Snjóölduvatn, 413 fiskar eru bleikjur. Meðalþyngd lág.
Hraunvötn eru með 260 urriða upp í 8 pund og meðalþyngd 1,95 pund. Þá er Eskivatn, hreint bleikjuvatn, með 236 bleikjur. Önnur vötn eru með færri skráða fiska. 9 pundarinn úr Litlasjó er ekki stærstur úr vötnunum, 10,1 punda kom úr Ónefndavatni og 10,5 punda úr Pyttlum.
