Í dag var fyrsti laxveiðidagurinn í Fljótaá. Einn leigutakanna var einn um hituna, Vigfús Orrason og hann hafði skemmtilega sögu að segja hvernig fyrstu laxarnir skiluðu sér.
„Ég er búinn að vera hér í nokkra daga í undirbúningi fyrir sumarið. Rétt skroppið af og til, til að ná í bleikju á grillið, en var úti á palli seinni partinn þegar fyrri skjálftinn kom. Fann vel fyrir honum og dreif mig niður að á. Fékk þá fyrsta lax sumarsins, 78 cm í Prestlænu. Svo ekkert, nema að svo kom seinni skjálftinn sem ég fann meira fyrir. Þá var ég kominn upp í Lönguflúðir og fékk annan, 92 cm. Þetta er ansi góð byrjun í Fljótaá, það þykir ekki tíðindum sæta þó að það veiðist ekki lax fyrr en komið er fram í júlí, þannig að þetta er skemmtilegt. Og hvorugur var lúsugur, sem svo sem segir ekkert, það er lón hér neðst sem hann getur verið að bíða í á meðan lúsin drepst og hverfur,“ sagði Vigfús
Hann bætti við að áin væri á yfirfalli og gruggug um daginn, en hefði hreinsast. Hlýindin hefðu síðan komið ánni í tíu gráður þrátt fyrir vatnselginn. Það hefði eflaust skipt sköpum.
