Það er ekki ýkja langt síðan að farið var að bjóða vorveiði á sjóbirtingi í Leirvogsá, en birtingurinn hefur verið að styrkja stöðu sína á vestanverðu landinu síðustu ár. Leirvogsá er þar engin undantekning. Við heyrðum í Þorgils Helgasyni sem átti þar eftirminnilegan dag í blíðviðrinu í vikunni.
„Já þetta var fallegur dagur. Besti dagurinn veðurlega séð post covid,“ sagði Þorgils í samtali við VoV. „Við lönduðum og slepptum 5 sjóbirtingum og „slepptum“ 2 til án þess að landa þeim. Geggjaður dagur í sól og vorblíðu. Sáum og fengum fiska í Birgishyl, Hornhyl, við Gömlu brú og Neðri Skrauta. Þeir sem við mældum á landi voru 55,64,65,66 og 80 cm. Þeir „misstu“ voru um 70 og um 65cm. Áin fór svo í kakó um klukkan 17 út af snjóbráð. Svo við Veiddum í raun aðeins um 4-5 tíma,“ bætti Þorgils við, en veiðifélagar dagsins voru Sverrir Þór, Ólafur Ragnar og Sigþór Steinn. Birtingarnir voru að taka andstreymisveiddar púpur, PT, Copper John og Squirmy. Einn misstur tók Black Ghost.