Sex laxveiðiár betri en í fyrra

Martin Bell, Einar Falur, Eystri Rangá
Glímt við lax í Eystri Rangá. Mynd Einar Falur.

Það er ekki ofsögum sagt um vatnsleysi og aflabrest í laxveiðiánum. En skyldu einhverjar þeirra vera með betri stöðu en á sama tíma í fyrra? Við skoðun fundum við alls sex slíkar ár, en í aðeins einu þeirra tilvika var aukningin umtalsverð. Það er í Eystri Rangá sem hafði þann 10.7 skilað 187 löxum meira á land heldur en 11.7 í fyrra. Skoðum þetta aðeins.

Vefur LV er með þann skemmtilega og nauðsynlega sið að birta vikulega veiðitölur úr fjölda laxveiðiáa. Við hér á VoV höfum síðustu árin nýtt þessar tölur til að gefa enn betri mynd af gangi mála. Núna ætlum við að taka flestar af ánum á lista LV (angling.is) og bera þær saman við sama tíma í fyrra. Nýjasta vikutalan nú er 10.7, en í fyrra var viðmiðunardagurinn 11.7. Einn dagur til eða frá skiptir engu í þessu samhengi. Nokkrum af ánum hjá LV er sleppt. Það er vegna þess að sumar voru ekki með nýrri tölu en 3.7 og aðrar voru ekki með viðmiðunartölu frá 2018.

Glímt við lax neðan við brú í Leirvogsá í gær. Myndina tók Jóhann Davíð Snorrason.

Það er ljóst, að hvað sem gerist héðan af þá mun þetta laxveiðisumar standa 2018 langt að baki. Þó gæti eitthvað ræst úr, t.d. var nýverið 18 laxa dagur í Elliðaánum, lax er sagður að ganga um öll neðri svæði Leirvogsár, það er vaxandi straumur og væta í kortunum. Við þetta má bæta orð Einars Lúðvíkssonar umsjónarmanns Eystri Rangár, að 10.7 hafi komið öflug ganga í Eystri Rangá sem skilaði 42 laxa degi, “besti dagurinn til þessa. Laxinn byrjar oft að ganga um 10.júlí þegar að nótt fer að dimma,” sagði Einar.

Segja má að Eystri Rangá tróni á toppnum þó að Urriðafoss sé með hæstu töluna. Í því samhengi að miðað sé við fyrrnefndar dagsetningar er Eystri Rangá með 187 löxum meira en í fyrra, eins og fyrr sagði, en Urriðafoss 216 löxum minna. En skellum okkur í listann, fyrsta talan er 10.7 s.l. en seinni talan 11.7 í fyrra. Í sviganum er munurinn.

Urriðafoss            502 – 718 (minus 216)

Eystri Rangá         405 – 216 (plus 187)

Miðfjarðará           202 – 515 (minus 313)

Blanda                  175 – 417 (minus 242)

Ytri Rangá             164 – 401 (minus 237)

Elliðaárnar              153 – 325 (minus 172)

Þverá/Kjarrá           140 – 1186(minus 1046)

Haffjarðará             133 – 487 (minus 354)

Brennan                  122 – 229 (minus 107)

Laxá í Aðaldal          114 – 175 (minus 61)

Grímsá                     94 – 301 (minus 207)

Norðurá                    83 – 834 (minus 751)

Selá                          62 – 215 (minus 153)

Flóka                         58 – 155 (minus 97)

Víðidalsá                    57 – 125  (minus 68)

Hofsá                          54 – 97     (minus 43)

Laxá á Ásum                54 – 172 (minus 118)

Skjálfandafljót              53 – 50   (plús 3)

Langá                          51 – 346 (minus 295)

Jökla                            48 – 38 (plús 10)

Laxá í Kjós                    42 – 276 (minus 234)

Ölfusá                           42 – 38 (plús 4)

Vatnsdalsá                     42 – 123 (minus 81)

Laxá í Leirársveit            34 – 176 (minus 142)

Hítará                            32-156 (minus 124)

Fnjóská                          29 – 25 (plús 4)

Laxá í Dölum                  28 – 136 (minus 108)

Hvítá v/Langholt              25 – 154 (minus 129)

Deildará                          24 – 21 (plús 3)

Hrútafjarðará                  16 – 45 (minus 29)

Gljúfurá í Bo.                   12 – 69 (minus 57)

Svartá í Hún.                     4 – 10 (minus 6)

Búðardalsá                         3 – 70 (minus 67)

Breiðdalsá                          1 – 10 (minus 9)

Elliðaárnar hafa verið bærilega líflegar í sumar þótt samanburðurinn við síðasta sumar sé ekki sá besti. Þessi mynd er frá 10.7 og við fengum hana af FB síðu Elliðaána, myndin sýnir Ragnar Snorra Pétursson hampa 84 cm hrygnu sem kom úr Grófarkvörn.

Talað hefur verið um góðan gang í Vopnafirði og í Jöklu, en bæði Selá og Hofsá eru í mínus. Um það er þó að segja að Selá var opnuð seinna en í fyrra, og með glæsibrag, en síðan lítið veidd í heila viku. Hofsá fór hægar af stað, en hefur sótt sig og er lífleg, hvernig svo sem sumarið kemur út. Jökla er tíu löxum í plús miðað við í fyrra og stefndi áin þá hraðbyri í metveiði, eða þar til yfirfall kom allt, allt of fljótt. Nú eru sagðar líkur á yfirfalli einhvern tíman í ágúst, seinna en í fyrra, en samt öruggt þar sem hátt er í Hálslóni. Engu að síður verður  gaman að fylgjast með gangi mála þar til þau ósköp dynja yfir..

En sem sagt, með örfáum undantekningum er þetta ekki fallegur listi, en enn gæti ræst úr, veiðimenn eru alltaf bjartsýnir.