Grímsá og Langá opnuðu í morgun og Skjálfandafljót í gærmorgun. Alls staðar komu laxar á land, en menn voru samt miskátir með afraksturinn.
Í skeyti sem barst frá Hreggnasa, leigutaka Grímsár sagði að stangirnar fjórar sem opnuðu Grímsá hefðu landað 9 löxum og hefðu það allt verið tveggja ára laxar af góðri stærð, stærst 90 cm sem veiddist í Strengjunum. Annars hefði löxum verið landað á öllum veiðisvæðum og nefndir í því sambandi hyljir á borð við Efstahyl, Klöpp, Strengina og Langadrátt. Fjórir laxar töpuðust í viðbót, allir í löndun og voru þeir atburðir í Gullberastaðastreng, Klöpp, Strengjunum og Langadrætti. Allir laxarnir veiddust á smáar „hitsaðar“ flugur. Grímsá er vatnslítil eins og aðrar ár á Vesturlandi, en lööngum hefur það verið sagt að áin haldi sínu betur en margar aðrar þegar þurrkar steðja að. Sama er sagt um Flóku, sem rennur um næsta dal.
Sett var í sex laxa á fyrstu vakt í Langá í morgun, en aðeins tveir þeirra náðust á land, annar í Holunni, hinn í Glanna. Laxarnir fjórir sem sluppu voru allir í Strengjunum. Gústaf Vífilsson sem meðal veiðimanna sem eru að opna ána sagði að menn hefðu í ljósi aðstæðna kannski ekki gert sér rífandi vonir, en þar sem þetta var fyrsta vakt og fiskur fyrir all nokkru farinn að ganga í ána hefði hann viljað sjá kannski 5-6. „En svona er þetta,“ sagði Gústaf. Þrátt fyrir vatnsmiðlun í Langavatni þá er Langá orðin æði ræfilsleg og sagði Gústaf að eftir því hefði verið tekið að laxinn væri búinn að gera sig heimakominn á stöðum sem að öllu jöfnu detta ekki inn fyrr en í ágúst.
Nefndi hann sem dæmi að laxinn sem veiddist í Glanna, kom úr hylnum, en framan af sumri veiðist laxar í Glanna á brotinu fyrir ofan hylinn. Þar getur enginn lax dokað við núna útaf vatnsleysinu.
Þá var Skjálfandafljót opnað í gærmorgun og óhætt að segja að vel hafi farið af stað. Sex laxar komu á land og fleiri sluppu. Komu laxar m.a. af „Austurbakka“ og úr Barnafelli.
