Svona endaði þetta í Veiðivötnum

Veiði er nú lokið í Veiðivötnum, þ.e.a.s. stangaveiðitímanum, en „landeigendur“ veiða áfram í net um tíma. Þeir afla sér í soðið og safna fiskum í undaneldi til að halda veiðiskapnum við, enda eru ekki hrygningarskilyrði fyrir slíka urriðastofna í vötnunum og þó að veiði hafi verið góð þar frá ómunatíð þá eru það sleppingarnar sem gera þetta að því djásni sem það er í dag.

Örn Óskarsson hefur um árabil haldið úti vef fyrir svæðið og höfum við oft og iðulega vitnað í hann. Nú, þar sem að endalok eru á veiði 2018 ætlum við að stíga skrefinu lengra og birta meir a envenjulega. En þetta skrifar Örn: „Í lokaviku stangveiðitímans komu 1357 fiskar á land og var besta veiðin í Litlasjó, enda héldu veiðimenn sig þar að mestu leiti. Í Litlasjó fengust 688 fiskar í vikunni sem er mjög gott svona síðsumars. Færri fiskar komu úr öðrum vötnum enda fáir veiðimenn þar á ferð.

Alls veiddust 19867 fiskar í Veiðivötnum á stangveiðitímanum, 9609 urriðar og 10258 bleikjur. Besta veiðin var í Litlasjó, 5171 urriði komu þar á land og meðalþyngdin yfir 2 pund og heildarþyngd afla 10966 kg. Þetta er betri veiði en undanfarin ár, og þarf að fara aftur til ársins 2012 til að finna hærri aflatölur úr Litlasjó. Næstmest veiddist í Snjóölduvatni, 5003 fiskar, en þar var uppistaðan í veiðinni smábleikja þó svo stærri fiskar væru innanum. Stærsti fiskur sumarsins var 12,0 pd urriði úr Hraunvötnum sem veiddist í fyrstu veiðivikunni og mesta meðalþyngdin var 3,52 í Grænavatni.