Fréttir af Vatnamótunum bárust seint og síðast inn á borð til okkar, en kannski var veiðin þar einna best? Hvað sem því líður, þá sendi Haukur Haraldsson okkur pistil, en hann hefur opnað Vatnamótin til margra ára…
Haukur sagði: „Vatnamótin tóku vel á móti okkur félögunum sem höfum verið að veiða þar síðastliðin 16 árin. Reyndar svo vel að aldrei höfum við veitt jafn vel og í jafn dásamlegu veðri. Veiðin var allt frá silfruðum frískum geldfiskum sem ekki voru með í hrygningunni í vetur, yfir í mjóslegnari en virðulegri hænga og hrygnur sem voru að troða sig út af sílum eftir hrygningu og föstu veturdvalarinnar í hyljum ánna sem renna í Skaftá.
Við settum í rúmlega 200 fiska á þeim tveim dögum sem við vorum við veiðar. Fiskarnir voru frá rétt rúmlega 40 cm upp í 80 cm. Áin tók á móti okkur full af ís á morgnana sem hún ruddi af sér um hádegi. En eins og áður sagði var veðrið eins fallegt og hægt var. Hitinn skreið yfir frostmark á morgnana og upp í 5°yfir miðjan daginn með logni og glampandi sól, farfuglar í yfirflugi og er vart er hægt að hugsa sér fallegri fjalla- og jöklasýn.“
