Enn höldum við áfram að gera upp laxveiðisumarið 2017 sem var ekki eins geggjað og margur hafði vonað. En var samt engin hrollvekja. Hér kemur úttekt Ragnars Gunnlaugssonar á Víðidalsá.
Áður en við köfum ofan í skýrslur Ragnars, sem er fyrrverandi formaður Veiðifélags Víðidalsár, skulum við rifja upp síðasta sumar í tölum í samanburði við síðustu árin. Lokatalan var 773 laxar. Á angling.is er talan 781 gefin upp, en Ragnar er með bækurnar undir höndum, þannig að tala hans er nákvæm. Það er ekki með betri sumrum í Víðidalnum, en hefur verið lakara, t.d. 692 laxar 2014 og 325 laxar sumarið 2012. Þá voru 2011 og 2007 einnig lakari en þó svipuð og nú með 747 og 714 stykki hvort sumar.
Betri sumrin eru all miklu flottari og sýna að sveiflur í Víðidalsá geta verið magnaðar. Þannig voru 2016 og 2015 með 1137 og 1626 laxa og sumrin 2008 til 2010 voru með 1440, 2019 og 1254 laxa. Sérstaklega stendur uppúr 2019 laxar sumarið 2009, sérstaklega í samanburði við 2012, þremur árum síðar, er veiðin dottin niður í 325 laxa. Þetta eru miklar sveiflur.
En Víðidalsá er ein af allra bestu laxveiðiám landsins hvað sem sveiflum líður og auk þess hefur hún þá sömu snilldarkosti og nágrannaáin vatnsdalsá, að fóstra stóra stofna sjóbirtings og sjóbleikju. Eitt sinn heyrum við á VoV bleikjunni í Víðidalsá lýst þannig að engu væri líkara en að sterar rynnu saman með árvatninu.
Og þá að skýrslu Ragnars, en þar sundurliðar hann veiðitölur Víðidalsár og Fitjár, en þær eru jafnan taldar saman. Víðidalsá var með 562 laxa, Fitjá 208 laxa. Alls 770. Þrír voru ekki staðsettir nákvæmlega í skýrslum. Það eru kunnugleg nöfn sem eru að skila mestu veiðinni, Dalsárós 86, Harðeyrarstrengur 82 og í Fitjá, Laxapollur með 54.
83% af laxi í Víðidalsá var sleppt. Sú tala hefur verið á stöðugri uppleið síðustu árin, var t.d. aðeins 14% 2008. Öllum stórlaxi, 70 cm og yfir, er sleppt, það voru alls 475 laxar s.l. sumar. Eins árs laxar voru 290 talsins og tuttugu þeirra undir 2 kílóum, eða 4 pundum. Augljóslega eru einhverjir að taka einhverja smálaxa með sé heim á grillið.
Ef stærðir eru sundurliðaðar nánar kemur í ljós að tíu laxar eru stærstir, á bilinu 100 til 111 cm. Það er einn 111 cm, 13,4 kg, einn 107 cm, 12,1 kg, einn 106 cm 11,8 kg, einn 103 cm 10,9 kg, tveir 102 cm 10,6 kg og fjórir 100 cm 10 kg. Þessir stærstu laxar voru ekki vegnir heldur notaður viðmiðunarkvarði þeirra félaga á Hafró. Stærsti laxinn var nokkuð sér á báti, (sjá mynd að ofan) ekki aðeins vegna þess að hann var stærstur heldur var þetta einn af stærstu löxum ársins yfir landið. Þetta var hrygna og 54 cm í ummál. Það var því hald manna að kvarði Hafró dygði skammt og töldu menn að lax þessi hefði vel getað losað 30 pundin, frekar en þessi tæpu 28 pund sem að kvarðin gaf upp.
Alls voru 362 laxar 79-99 cm, eða 5,1 til 9,7 kg og 103 laxar voru 70-78 cm eða 3,6 til 5 kg. 290 laxar voru undir 70 cm. Úr þeirri tölu má lesa smálaxaskort. Meðalvigt skv fyrrnefndum kvarða er 4,7 kg. Þar má einnig lesa smálaxaskortinn.
Ragnar leggur ekki minni natni við að gera upp silungsveiðina í ánni, en áin er ein besta silungsveiðiá landsins og mikið um stóra fiska. Sjóbleikjan er liðflest og alls veiddust 1013 bleikjur, 624 sem meðafli á laxasvæðinu og 389 á silungasvæðinu neðst í ánni. Urriðar voru 304 talsins, 190 sem meðafli á laxasvæðinu og 114 á silungasvæðinu. Mest af urriðanum er sjóbirtingur sem hefur verið að sækja í sig veðrið síðustu árin.
Ragnar sagði: „Mikil vonbrigði hvað lítið kom af smálaxi eins og hvað vorið 2016 var hagstæt en kannske er ekki æskilegt að seiðin gangi snemma út. Áberandi er hvað urriðinn er að sækja á. Held að það sé ekki æskilegt fyrir laxa- og bleikjustofninn, hann hakkar í sig mikið af seiðum eftir að hann hefur náð 3-4 punda þyngd. Hef talið 4 gönguseiði úr maga á einum slíkum.“
