Það er tilfinning manna að laxveiðin hafi farið mjög vel af stað og hér birtum við nokkrar tölur sem svo sannarlega staðfesta það. Þetta kemur örlítið á óvart því að fæstir reiknuðu með sterkur stórlaxagöngum.
Nýja undrið, Urriðafoss í Þjórsá, hefur slegið í gegn. Fyrstu sex veiðidagana komu þar á land 80 laxar á tvær dagstangir sem er milli 6 og 7 laxar á hverja dagstöng. Ekkert lát á veiðinni þar.
Blanda fór líka afar vel af stað, en veiðin þar hófst 5.6 s.l. Eftir tvo og hálfan dag hafði 28 löxum verið landað á fjórar stangir. Sjö stykki æa hverja stöng að meðaltali. Ekki amaleg veiði það.
Og ekki eru menn að kvarta við Norðurá. Þar var veitt á átta stangir fyrstu dagana og voru 33 komnir á land eftir tvö daga. Þar virtist takan vera „grennri“ því að a.m.k. annað eins af laxi tók en slapp.
All nokkrar ár hafa bæst í ört stækkandi hóp þar sem menn hafa verið að sjá til laxa óvenju snemma. Má nefna Selá í Vopnafirði, Elliðaárnar, Stóru Laxá, Ytri Rangá og fleiri.