Það kennir jafnan margra grasa á viðburði sem þessum. Mynd Heimir Óskarsson.

Kristján Friðriksson rekur og ritstýrir líflegum veiðivef sem heitir fos.is og hefur hann síðustu tvö árin staðið fyrir fluguhnýtingarviðburði sem haldin hefur verið á FB. Nú í febrúar verður blásið til leiks í þriðja skiptið. Uppákomunni hefur vaxið fiskur um hrygg.

Í fréttatilkynningu sem Kristján sendi til VoV segir meðal annars: „Þriðja árið í röð mun FOS.IS standa fyrir hnýtingarviðburði nú í febrúar. Eins og áður fer viðburðurinn fram á Facebook þar sem hnýtarar setja inn myndir af þeim flugum sem þeir eru að hnýta og áhugamenn um flugur og fluguhnýtingar geta virt afraksturinn fyrir sér.

Að þessu sinni verður aukið verulega við dagskránna því í samstarfi við Ármenn verða haldin fern hnýtingarkvöld í Árósum, Dugguvogi 13 frá kl. 20 – 22, alla mánudaga í febrúar. Þar gefst gestum kostur á að kynnast handbragði nokkurra þekktra hnýtara, s.s Stefáns Hjaltested, Robert Nowak, Ingvars Ingvarssonar og Hjartar Oddssonar, auk þess sem gestum er boðið að nýta sér aðstöðu Ármanna til hnýtinga og fluguspjalls yfir rjúkandi kaffibolla. Að auki munu styrktaraðilar Febrúarflugna vera á staðnum og kynna hnýtingar- og stangveiðivörur sínar fyrir gestum og gangandi.“

Síðan segir Kristján frá umfangi viðburðarins í fyrra:  „Í fyrra bárust hátt í 400 flugur í viðburðinn og vonir standa til að enn fleiri berist að þessu sinni. Ungir og upprennandi hnýtarar eru eindregið hvattir til að leggja sitt að mörkum, sýna flugur sínar og handbragð og njóta leiðsagnar reyndari hnýtara á hnýtingarkvöldunum.“  Nánar má lesa um atburðinn á www.fos.is