Þau tíðindi hafa orðið að Skandínavíska veiðivörufyrirtækið Nam Products hefur fest kaup á íslenska fyrirtækinu Einarsson Fly Fishing og mun NP hér eftir sjá um sölu á hinum víðfrægu fluguhjólum frá Einarsson.
Steingrímur Einarsson stofnandi og nú fyrrverandi eigandi Einarsson Fly Fishing skrifaði eftirfarandi færslu á FB síðu sína: „Nám products hefur nú keypt vörumerki Einarsson Fly Fishing og munu hér eftir sjá um sölu á Einarsson hjólunum. Það má segja að það séu blendnar tilfinningar þessa dagana sem bærast með mér en á sama tíma er ég afskaplega sáttur við kaupandann. Ég vil nota tækifærið og þakka þeim fjölmörgu vinum og viðskiptavinum sem hafa stutt mig í gegum tíðina en nákvæmlega fyrir 19 árum voru fyrstu hjólin smíðuð.“
Í skilaboðum sem Nam Products sendir lesendum sínum á vefsíðu sinni segir m.a.: „Við gætum ekki verið spenntari að greina frá þessum samruna þar sem gildin sem hafa fylgt hönnun Einarsson fluguhjólana hafa verið lýsandi í allri hönnun vara okkar. Þar er reynt að ganga skrefinu lengra í hönnun, til samræmis við þá línu sem fylgt er í Skandinavískri hönnun. Við gætum ekki hugsað okkur betri viðbót við vörulínur okkar og erum ákveðnir í að halda þeim háa standard sem Einarsson og Nam hafa til þessa viðhaldið og þróað með það að markmiði að gera enn betur. Þá er mikil tilhlökkun hjá okkur að kynna í náinni framtíð hvað samruni fyrirtækja okkar muni skila.“ En þess má geta að Nam Products framleiðir helst flugustangir og línur.
