Veiði hófst í fjórum meiri háttar laxveiði ám í dag, Elliðaánum og Víðidalsá í morgun og Vansdalsá og Laxá í Aðaldal seinni partinn. Alls staðar var lax, en hvergi mikið, helst þó að Víðidalurinn stæði undir minni háttar væntingum.
„Þetta voru sex fiskar fyrsta daginn, fjórir í morgun og alla vega tveir seinni partinn. Það er ekkert mikið af fiski en það hefur sést eða verið sett í á öllum svæðum. Þetta eru allt 82 til 84 cm hrygnur. Menn halda að það sé lítið af fiski, en samt var sett í tíu í morgun, sex sluppu og eftir daginn hafði verið sett í 15 þó að aðeins sex næðust á land. Skilyrði voru ekki góð, glampandi sól og það eina sem gaf voru litlar flugur, helst á hitsi. Það er af sem áður var að talað var um að það þýddi ekki að kasta flugu fyrr í júlí,“ sagði Jóhann Rafnsson umsjónarmaður við Víðidalsá í samtali í kvöld.
Laxá í Aðaldal opnaði einnig, seinni partinn og í fyrsta skipti er öll áin í gangi saman, Nes og Laxamýrasvæðin. Jón Helgi Björnsson sendi okkur stutta skýrslu: „Fengust 2 í Æðarfossum, einn í Sjávarholu og annar í Miðfosspolli, báðir 84 cm hrygnur. Þrír misstust þar á meðal einn stór á Knútstöðum. Menn reistu fiska víða um ána.“
Vatnsdalsá opnaði einnig en ekki fengust aðrar upplýsingar þaðan en að þar hefði verið líf og hvað Elliðaárnar varðar þá veiddist ekkert á fyrstu vakt.
