Glímt við lax á Hauksstaðabroti í Jöklu. Myndin er frá Strengjum.

Vikutölur angling.is hafa verið að skila sér inn síðan seint í gærkvöldi. Og þetta er upp og ofan eins og fyrri daginn. Hátíð þó miðað við hörmungina í fyrra. Sömu árnar eru á góðum stað, aðrar á sínum fyrri stað, fremur slakar en þó mun betri en í fyrra

Við rennum nú yfir þetta, að venju er fyrsta talan heildartalan miðað við gærkvöldið, talan á eftir er vikutalan og talan í sviganum er lokatala síðasta sumars og sjá má að góður slatti af ám er þegar kominn fram úr þeirri tölu þó að margar ár séu samt sem áður ekki alveg að standa undir væntingum.

Eystri Rangá   6791 – 1470 (3048)

Eystri var búin að vera frábær, en allt fór af límingunum þegar blandað agn var aftur leyft í ánni. Vikuveiðin er ein sú hæsta sem sést hefur, ekki þó sú hæsta, við fundum eina viku sem var betri, en meira um það seinna. Enn er lax að ganga og aflinn góð blanda af stórlaxi og smálaxi. Það er löngu orðið ljóst að áin verður lang hæst þegar að vertíðarlokum kemur, þ.e.a.s. tölulega hæst.

Ytri Rangá ásamt vesturbakka Hólsár  1820 – 121  (1675)

Sumarið 2020 er augljóslega mun betra en í fyrra, en samt hefðu menn viljað sjá meiri styrk í göngum og veiði. Lítið breyst þar milli vikna.

Miðfjarðará  1283  – 81  (1606)

Vikan í Miðfjarðará var jöfn fyrri viku, 81 lax, en að venju getum við sagt það  magnað hvað hún heldur vel standard á sama tíma og flestar ár á Norðurlandi eru daufar.

Affall   1060 – 184 (323)

Veiðin í Affalli stendur og fellur með því hvernig fer með gönguseiðasleppingar og að þessu sinni hefur tekist fanta vel til. Nýja työlu vantar, þessi er þá sem sagt frá 19.ágúst, en áin verið á bullandi skriði og komin langt yfir tölu síðasta sumars. Ævintýrið heldur áfram.

Selá í Vopn.  1022 – 173  (1484)

Selá er með flotta vikutölu enn og aftur og er á sama góða rólinu og síðustu tvö sumrin. Vikutalan er sú besta í Selá á þessu sumri. Það stefnir sem fyrr í að hún verði síst lakari en í fyrra, sem var gott ár í Selá þrátt fyrir harðlífið víðast hvar annars staðar á landinu.

Urriðafoss   954 – 11  (747)

Eins og stundum áður hefur dalað í Urriðafossi þegar liðið hefur á sumar. Veiðin er samt komin langt yfir veiði síðasta sumars og gæti með góðum endaspretti náð fjögurra stafa tölu. Af vikutölunni má sjá að enn er fiskur að ganga þó að mjög hafi dregið hafi úr göngum. Á sama tíma hefur veiðin á öðrum svæðum Þjórsár verið nokkuð góð og gaman væri að sjá samantekna veiðitölu úr allri Þjórsá.

Haffjarðará  918 – 63 (651)

Veiði hefur verið góð í Haffjarðará og er hún eigi ósvipuð Miðfjarðará að því leyti að hún er miklu stöðugri í veiði heldur en ár í kringum hana. Komin langt yfir síðasta sumars tölu og gæti farið í fjögurra stafa tölu. Vikutalan sýnir að áin er í góðum gír, þó að dregið hafi úr frá fyrri viku. Gæti skrifast á stanslaust sólskin. Það spurning hvað veldur svo glæsilegum stöðugleika á meðan sveiflur dingla til og frá allt í kring. Aðstandendur árinnar hafa sagt það m.a. geta stafað af því að veiðum er hætt snemma og ekki barið á laxinum langt fram á haust eins og tíðkast víða.

Reynir Friðriksson með einn í stærri kantinum úr Eystri Rangá. Myndin er fengin af FB síðu Reynis.

Hofsá í Vopn.  830 – 78  (711)

Hofsá hefur verið á hægum batavegi síðustu árin eftir talsverða lægð. Í sumar hefur hún gefið í og er með bestu ám landsins sumarið 2020. Og á enn mikið inni. Lokatala síðasta sumars er löngu fokin.

Norðurá  829 – 41  (577)

Vissulega mun skárra en í fyrra, en samt er Norðurá langt frá sínu besta. Meira að segja langt frá því að vera í einhverskonar meðalveiði. Mikil vonbrigði þarna því miður. Árnar í Borgarfirði eru að sverja sig svolítið í átt til flestra áa á Norðurlandi. Það var lítið af stórlaxai vegna smálaxafæðar í fyrra og svo er smálaxinn mikið til að bregðast núna þó að meira sé af honum en í fyrra.

Þverá/Kjarrá  826 – 55  (1133)

Þverá/Kjarrá eru í sama báti og aðrar Borgarfjarðarár. „Ástandið hérna er bara staðreynd,“ sagði Ingólfur Ásgeirsson einn leigutaka árinnar í samtali við VoV. Vikutalan er hin sama og í fyrri viku og styttist í vertíðarlok.

Jökla   795 – 115 (414)

Enn skilar Jökla þriggja stafa vikutölu og áin er ein af bestu ánum þetta sumarið. Yfirfallsdraugurinn er hins vegar mættur og verður einungis veitt í hliðaránum og vatnaskilum þeirra til loka vertíðar. Það stefndi í met í fyrra þegar yfirfallið brast á allt, allt of snemma og skemmdi allt. Metveiði árinnar er 815 laxar sumarið 2015. Útlit er fyrir því að nýtt met verði sett í ánni þrátt fyrir yfirfallið.

Langá   734 – 73  (659)

Langá mun að sönnu skila tölu sem er vel yfir hroðalegheitunum í fyrra, en þó að talsvert meira sé af laxi nú en þá, þá hefðu Langármenn eflaust viljað sjá meiri veiði og hærri tölur. Langá er þó fræg fyrir góð haustskot og því verður spurt að leikslokum.

Laxá í Kjós  636 – 31  (372)

Það mætti setja hér sama textann og fylgdi umfjöllun okkar um Langá. Nákvæmlega orðrétt gildir hér. Þó má bæta við að Laxá hefur þann gæðamun umfram Langá og fleiri ár, að mikið er af stórum sjóbirtingi í ánni og eykur það gæði árinnar til mikkilla muna

Laxá á Ásum  565 – 63  (807)

Þetta var frekar róleg vika í Ásunum. En það styttist í vertíðarlok og spurning hvort að áin nái tölu síðasta sumars. Kunnugir segja að meira sé af laxi í ánni nú en þá og ef skilyrði verði í lagi, gæti áin jafnvel gert betur í sumar en í fyrra.

Laxá í Dölum  488 – 31 (746)

Laxá fór þumbaralega af stað og hefur verið brokkgeng í sumar. Eitt og eitt skot hefur glatt menn, en svo eru vikur eins og sú síðasta. Með sama áframhaldi er spurning hvort að áin fari  yfir tölu síðasta sumars, sem þó verður að segja að hafi ekki verið sérlega flott. Áin er hins vegar fræg fyrir öflug skot á haustin.

Elliðaárnar  461 – 45  (537)

Hermt er að mun meiri laxgengd sé í ána en í fyrra og að hún eigi mikið inni. Hún er nú aðeins veidd með flugu og þar með hafa nokkrir gjöfulir staðir gefið minna en ella. Vikutalan er betri en í fyrri viku miðað við stangarfjölda, kannski má um það kenna hitabylgjunni sem þá var, en á móti var síðasta vika mikið til veidd í heiðskýru og sólríku veðri.

Laxá í Leirársveit – 420 – 45 (359)

Laxá skröltir áfram og hefur lötrað yfir sína hörmungartölu frá í fyrra. Mun meira er af laxi en í fyrra, að undanförnu hefur farið saman óheppilegt veðurfar og fremur slök nýting veiðileyfa. Áin á slatta inn, hún er oft góð á haustin. Þá er haft fyrir satt að mikið sé af rígvænum sjóbirtingi í ánni.

Grímsá  391 – 13  (724)

Grímsá hefur verið slök í sumar og vikan var í stíl. Þetta er líkt og í helstu nágrannaánum. Áin er hins vegar annáluð síðsumarsá og gæti lumað á góðum endaspretti.

Þverá í Fljótshlíð  358 – 42  (143)

Þverá stólar á gengi gönguseiðasleppinga eins og fleiri ár á þessum slóðum. Þær hafa tekist vel eins og í Eystri Rangá og Affalli. Veiðin hefur verið góð í Þverá og áin komin langt yfir tölu síðasta sumars.

Skjálfandafljót  326 – 32 (330)

Það styttist í lokatölu síðasta árs og áin ætti að sigla létt fram úr henni nema að skilyrðin hamli því. Þar með verður áin enn ein sem hristir af sér lélega útkomu síðasta árs.

Laxá í Aðaldal  315 – 9 (501)

Það er sama harðlífið hjá drottningunni. Áin er skráð með 17 stangir hjá angling.is og vikutalan er 9 laxar sem er mjög dapurlegt. Slök hefur hún verið síðustu ár og slök var hún í fyrra, en hvernig endar áin þetta sumarið? Ekki mikið að gerast og nýir fiskar af skornum skammti.

Svalbarðsá  302 – 33 (469)

Þetta svona drattast áfram í Svalbarðsá og spurning með lokavikurnar, hvernig þær fara. Heildarveiðin er allt í lagi, en hefur oft verið miklu betri síðustu sumrin.

Vatnsdalsá  280 – 29  (477)

Það er rólegt í Vatnsdalnum og ekki hægt að segja annað um göngur í ána en að það reytist inn fiskur. Áin var slök í fyrra og ekki víst að hún jafni þá tölu. Lífleg sjóbirtings- og sjóbleikjuveiði er þó fín og hífir upp gæðin, enda eru þessir fiskar vænir í ánni líkt og í nágrannaánni Víðidalsá.

Hrútafjarðará  252 – 5  (401)

Rólegt í Hrútafirði eins og víðar á Norðurlandi. Afar slök vika. Erfitt að spá fyrir uframhaldið m.t.t jöfnunar á lokatölunni frá 2019.

Hafralónsá  241 – 27  (357)

Fremur slök vikutala og áin er talsvert lakari en í fyrra. Það gildir um Sléttuárnar og Þistilfjarðarárnar, að það vantar talsvert upp á að smálaxagöngur hafi verið góðar.

Stóra Laxá  218 – 22  (480)

Stóra er fremur róleg um þessar mundir, en það er hún oft um hásumar. Hrikalegar aflahrotur á haustin hafa skotið veiðitölum í ánni upp í ótrúlega statistík hvað eftir annað. Það gerist kannski í haust, en í fyrra varð það eitthvað endasleppt.

Straumfjarðará  213 – 20  (169)

Áin er komin yfir sína lélegu tölu frá 2019, en fyrri leigutakar sögðu okkur að góð vertíð í Straumfjarðará ætti ekki að vera undir 300 löxum og þá væri bara verið að tala um þokkalegt sumar. Enn er tími, best að sjá til hvernig þetta fer.

Leirvogsá  210 – 18  (113)

Vertíðin í Leirvogsá er mun betri en í fyrra og umtalsvert meira af fiski í ánni nú en þá. Hins vegar hefur slök nýting á köflum haldið veiðum niðri.

Nú sláum við botninn í þetta þessa vikuna, en nokkrar þekktar ár eru enn neðar á llistanum. Þá eru þó nokkrar ekki með að þessu sinni af þeirri einföldu ástæðu að umsjónaraðilar höfðu ekki sett inn nýjar tölur við vinnslu þessarar greiningar.