Stóru hængarnir eru víða farnir að taka við sér, m.a. í Mýrarkvíslinni þar sem þessi svaðalegi höfðingi laut í gras....en var svo sleppt að sjálfsögðu. Myndin er af FB síði Matthíasar Þórs Hákonarsonar.

Vikutölur angling.is hafa verið að skila sér inn síðan seint í gærkvöldi. Og þetta er upp og ofan eins og fyrri daginn. Hátíð þó miðað við hörmungina í fyrra. Við ætlum að halda útfærslu umfjöllunarinnar að þessu sinni, eins og við gerðum í síðustu viku, en tökum ekki allan pakkann, aðeins töluhæstu árnar eitthvað niður eftir listanum.

Við rennum nú yfir þetta, að venju er fyrsta talan heildartalan miðað við gærkvöldið, talan á eftir er vikutalan og talan í sviganum er lokatala síðasta sumars og sjá má að góður slatti af ám er þegar kominn fram úr þeirri tölu þó að margar ár séu samt sem áður ekki alveg að standa undir væntingum.

Eystri Rangá   5421 – 834 (3048)

Eystri er enn á góðu stími með mjög góða vikutölu miðað við að skilyrðin voru á tíðum erfið. Var vikutalan t.d. mun betri en í vikunni á undan. Enn er lax að ganga og aflinn góð blanda af stórlaxi og smálaxi. Það er löngu orðið ljóst að áin verður lang hæst þegar að vertíðarlokum kemur, þ.e.a.s. tölulega hæst.

Ytri Rangá ásamt vesturbakka Hólsár  1699- 150  (1675)

Sumarið 2020 er augljóslega mun betra en í fyrra, en samt hefðu menn viljað sjá meiri styrk í göngum og veiði. Lítið breyst þar milli vikna.

Miðfjarðará  1202  – 81  (1606)

Vikan í Miðfjarðará var talsvert lakari en á undan, en að venju getum við sagt það  magnað hvað hún heldur vel standard á sama tíma og flestar ár á Norðurlandi eru daufar.

Affall   1060 – 184 (323)

Veiðin í Affalli stendur og fellur með því hvernig fer með gönguseiðasleppingar og að þessu sinni hefur tekist fanta vel til. Mok síðustu viku og áin á bullandi skriði og komin langt yfir tölu síðasta sumars. Ævintýrið heldur áfram

Urriðafoss   943 – 42  (747)

Eins og stundum áður hefur dalað í Urriðafossi þegar liðið hefur á sumar. Hafa ber þó í huga að skilyrði hafa oft verið afar erfið, eins og t.d. einmitt síðasta vika. Veiðin er samt komin langt yfir veiði síðasta sumars og gæti með góðum endaspretti náð fjögurra stafa tölu. Af vikutölunni má sjá að enn er fiskur að ganga þó að dregið hafi úr göngum.

Selá í Vopn.  869 – 120  (1484)

Selá er með flotta vikutölu enn og aftur og er á sama góða rólinu og síðustu tvö sumrin. Mallar áfram eins og vel smurð vél. Stefnir í að hún verði síst lakari en í fyrra, sem var gott ár í Selá þrátt fyrir harðlífið víðast hvar annars staðar á landinu.

Haffjarðará  855 – 102 (651)

Veiði hefur verið góð í Haffjarðará og er hún eigi ósvipuð Miðfjarðará að því leyti að hún er miklu stöðugri í veiði heldur en ár í kringum hana. Komin hundrað löxum yfir síðasta sumar og gæti farið í fjögurra stafa tölu. Vikutalan sýnir að áin er í góðum gír. Það er spurning hvað veldur svo glæsilegum stöðugleika á meðan sveiflur dingla til og frá allt í kring. Aðstandendur árinnar hafa sagt það m.a. geta stafað af því að veiðum er hætt snemma og ekki barið á laxinum langt fram á haust eins og tíðkast víða.

Norðurá  788 – 58  (577)

Vissulega mun skárra en í fyrra, en samt er Norðurá langt frá sínu besta. Meira að segja langt frá því að vera í einhverskonar meðalveiði. Mikil vonbrigði þarna því miður. Árnar í Borgarfirði eru að sverja sig svolítið í átt við flest allar ár á Norðurlandi. Það var lítið af stórlaxi vegna smálaxafæðar í fyrra og svo er smálaxinn mikið til að bregðast núna þó að meira sé af honum en í fyrra.

Þverá/Kjarrá  771 – 55  (1133)

Þverá/Kjarrá eru í sama báti og aðrar Borgarfjarðarár. „Ástandið hérna er bara staðreynd,“ sagði Ingólfur Ásgeirsson einn leigutaka árinnar í samtali við VoV.

Hofsá í Vopn.  752 -114  (711)

Hofsá hefur verið á hægum batavegi síðustu árin eftir talsverða lægð. Í sumar hefur hún gefið í og er með bestu ám landsins sumarið 2020. Og á enn mikið inni. Lokatala síðasta sumars fauk í vikunni.

Jökla   680 – 121 (414)

Enn skilar Jökla þriggja stafa vikutölu og áin er ein af bestu ánum þetta sumarið. Litlu máli skipti þó að hitabylgja hafi hangið yfir svæðinu drjúgan hluta vikunnar. Yfirfallsdraugurinn hangir þó alltaf yfir Jöklu og nú er útlitið sagt svart, einmitt vegna téðra hita.  Það stefndi í met í fyrra þegar yfirfallið brast á allt, allt of snemma og skemmdi allt. Metveiði árinnar var 815 laxar sumarið 2015. Nú er stóra spurningin hvenær kemur yfirfall, því mikið er af laxi í ánni og veiði góð.

Laxá á Ásum  502 – 49  (807)

Þetta var frekar róleg vika í Ásunum. En það styttist í vertíðarlok og spurning hvort að áin nái tölu síðasta sumars. Kunnugir segja að meira sé af laxi í ánni nú en þá og ef skilyrði verði í lagi, gæti áin jafnvel gert betur í sumar en í fyrra. En yfir það heila þá er ekki tilefni til að reikna með góðri vertíð þetta árið.

Laxá í Dölum  457 – 71 (746)

Laxá fór þumbaralega af stað, en fyrri vikuveiðin að þessu sinni sýndi hvað áin átti mikið inni. Síðasta vika var ekki eins góð, en alveg bærileg samt. Með sama áframhaldi fer hún vel yfir tölu síðasta sumars, sem þó verður að segja að hafi ekki verið sérlega flott. En góður gangur í Laxá sem stendur

Elliðaárnar  416 – 23  (537)

Hermt er að mun meiri laxgengd sé í ána en í fyrra og að hún eigi mikið inni. Hún er nú aðeins veidd með flugu og þar með hafa nokkrir gjöfulir staðir gefið minna en ella. Vikutalan er lakari en í fyrri viku miðað við stangarfjölda, kannski má um það kenna hitabylgjunni.

Grímsá  403 – 62  (724)

Grímsá hefur örlítið hjarnað við síðustu tvær vikurnar, en samt er þetta ekki ávísun á gott sumar í ánni. Líkt og í helstu nágrannaánum. Áin er hins vegar annáluð síðsumarsá og gæti lumað á góðum endaspretti.

Hítará  400 – 30  (204)

Hítará var ömurleg í fyrra og augljóslega mun skárri nú. Hún hefur á köflum verið illa seld og kann að skýra að tölur séu ekki hærri, því hermt er að fínar göngur hafi komið í ána í sumar.

Laxá í Leirársveit – 375 – 45 (359)

Laxá skröltir áfram og hefur lötrað yfir sína hörmungartölu frá í fyrra. Mun meira er af laxi en í fyrra, að undanförnu hefur farið saman óheppilegt veðurfar og fremur slök nýting veiðileyfa. Áin á slatta inn, hún er oft góð á haustin. Þá er haft fyrir satt að mikið sé af rígvænum sjóbirtingi í ánni.

Þverá í Fljótshlíð  316 – 85  (143)

Þverá stólar á gengi gönguseiðasleppinga eins og fleiri ár á þessum slóðum. Þær hafa tekist vel eins og í Eystri Rangá og Affalli. Veiðin hefur verið góð í Þverá og áin komin langt yfir tölu síðasta sumars.

Laxá í Aðaldal  306 – 27 (501)

Það er sama harðlífið hjá drottningunni. Áin er skráð með 17 stangir hjá angling.is og vikutalan er 27 laxar. Slök hefur hún verið síðustu ár og slök var hún í fyrra, en hvernig endar áin þetta sumarið? Ekki mikið að gerast og nýir fiskar af skornum skammti.

Haukadalsá  305 – 43  (251)

Augljóslega mun betri en í fyrra, en samt engin glans. Þó er sagt að mun meira sé af laxi en í fyrra, þannig að hver veit hvernig þetta endar.

Skjálfandafljót  294 – 13 (330)

Hiti og grugg skýrir ugglaust slaka vikutölu, en það styttist í lokatölu síðasta árs og áin ætti að sigla létt fram úr henni nema að skilyrðin hamli því.

Svalbarðsá  269 – 34 (469)

Þetta svona drattast áfram í Svalbarðsá og spurning með lokavikurnar, hvernig þær fara. Heildarveiðin er allt í lagi, en hefur oft verið miklu betri síðustu sumrin.

Vatnsdalsá  251 – 26  (477)

Það er rólegt í Vatnsdalnum og ekki hægt að segja annað um göngur í ána en að það reytist inn fiskur. Áin var slök í fyrra og ekki víst að hún jafni þá tölu. Lífleg sjóbirtings- og sjóbleikjuveiði er þó fín og hífir upp gæðin, enda eru þessir fiskar vænir í ánni líkt og í nágrannaánni Víðidalsá.

Hrútafjarðará  247 – 37  (401)

Rólegt í Hrútafirði eins og víðar á Norðurlandi. Þokkalegt kropp en ekki meira. Erfitt að spá fyrir uframhaldið m.t.t jöfnunar á lokatölunni frá 2019.

Hafralónsá  214 – 31  (357)

Slök vikutala og áin er talsvert lakari en í fyrra. Það gildir um Sléttuárnar og Þistilfjarðarárnar, að það vantar talsvert upp á að smálaxagöngur hafi verið góðar.

Stóra Laxá  196 – 34  (480)

Stóra er fremur róleg um þessar mundir, en það er hún oft um hásumar. Hrikalegar aflahrotur á haustin hafa skotið veiðitölum í ánni upp í ótrúlega statistík hvað eftir annað. Það gerist kannski í haust, en í fyrra varð það eitthvað endasleppt.

Brennan  193 – 3  (187)

Svæðið skreið í vikunni yfir heildartölu síðasta sumars. Síðsumar og haustið eru ekki bestu tímabilin þarna, nema að menn séu að eltast við sjóbirting. Þannig að heildartalan mun tæplega hækka mikið. En hver veit? Þó benda vikutölur Brennu, Strauma og Skugga til þess að laxagöngum sé lokið í Borgarfirði þetta árið og enn veit enginn hvaða áhrif flóðbylgjan og leirburður vikunni muni hafa, bæði til skemmri tíma og lengri tíma litið.

Straumfjarðará  193 – 59  (169)

Áin er komin yfir sína lélegu tölu frá 2019, en fyrri leigutakar sögðu okkur að góð vertíð í Straumfjarðará ætti ekki að vera undir 300 löxum og þá væri bara verið að tala um þokkalegt sumar. Enn er tími, best að sjá til hvernig þetta fer.

Nú sláum við botninn í þetta þessa vikuna, en nokkrar á eru enn neðar á llistanum. Þá eru þó nokkrar ekki með að þessu sinni af þeirri einföldu ástæðu að umsjónaraðilar höfðu ekki sett inn nýjar tölur nú síðdegis fimmtudaginn 20.8. Flestar eða allar væru þær inni með nýjum tölum. Þetta eru Laxá í Kjós, Langá, Blanda, Víðidalsá og Leirvogsá svo eitthvað sé nefnt.