Laxinn er að sýna sig út af allar jarðir þessa daganna. Víða fyrr en venjulega og er það í anda þess að sláttur er að hefjast á Suðurlandi 3 vikum fyrr en vant er. En það eru samt blikur á lofti, vatn er þverrandi og minnir nú á seinni hluta júlí í þurrkasumri. Fiskur stoppar nú hvergi, heldur rennur upp árnar.
Við heyrðum aðeins í Andrési Eyjólfssyni í Síðumúla sem löngum hefur verið umsjónarmaður og leiðsögumaður í Þverá. Hann hefur verið að fylgjast með ánni síðustu daga og vikur. Staðan er bæði lofandi og hið gagnstæða. „Ég fór í síðustu viku og sá nokkra boltalaxa, bæði í Guðnabakkastrengjum og Kaðalstaðahyl. Nokkra fiska. Svo fór ég með Alla Péturs,leiðsögumanni, og hann sá allt að fjórtán fiska í Kaðalstaðastrengnum. Daginn eftir var ég einn á ferð og sá 7-8 á sama stað, þannig að hann rennur hratt upp ána og er klárlega kominn upp í Kjarrá líka, enda sást til stórlax ryðjast upp grynningar á Norðtungueyrum um helgina. Það er líka áhugavert, að við höfum líka séð smálaxa í göngu við hliðina á þeim stóru og að sjá þá sjón í mai er vægt til orða tekið óvenjulegt. En ástandið í vatnsbúskapnum er ekki beysið. Árnar eru núna eins og í seinni hluta júlí í þurrkasumri og menn verða að nota granna tauma og örsmáar flugur alveg frá opnun ef einhver árangur á að nást. Hvernig þetta fer síðan fer eftir því hvað veðurguðirnir ákveða, en fyrir tíu dögum flaug ég yfir Tvídægru. Þar var ekkert vatn á ís og aðeins 4-5 skaflar. Minnti meira á september eða októberdag eftir fyrstu snjókomulægðina. Sama var uppi á teningunum við Víghól.“
Aðspurður um flugufregnir um að lax hefði veiðst á Brennutanga þann 11.mai, sagðist Andrés ekki geta staðfest það. „En ég yrði ekki hissa á því. Í gamla daga settu menn netin út 20.mai og það var alltaf veiði, stundum meiri, stundum minni, en alltaf fiskur. Og svo hafa alltaf verið fregnir af löxum að veiðast á svæðinu í mai þegar silungsveiðimenn eru að reyna að ná sér í sjóbirting.“
Þessar fregnir úr Borgarfirðinum eru í takt við annað sem heyrst hefur. Laxinn löngu kominn í Kjósina, í morgun í Elliðaárnar staðfest þó að menn hafi séð fiska síðustu daga sem menn voru ekki tilbúnir að staðfesta. En það gerist ekki á hverju ári að lax sjáist í Elliðaánum í mai. Það er líka óstaðfest að lax hafi sést um helgina í Sjávarfossi í Korpu. Tveir laxar sem æddu niður strengina þegar gengið var fram á litla klettinn.
Þjórsá verður fyrst að opna á laugardagsmorgun og þann 26.mai voru leigutakar Urriðafoss með kynningu á svæðinu. Við Urriðafoss eru tveir megin veiðistaðir, Hulda og Lækjarlátur. Í Huldu var augljóslega talsvert af fiski og þeir sýndu sig líka í Lækjarlátri. Þannig að fróðleg verður opnin þar.
Þá er Blanda ekki undanskilin því þar gengur fiskur snemma þó að áin sé á Norðurlandi. Höskuldur Birkir Erlingsson sagði okkur í dag að það væru nokkrir dagar síðan að hann horfði á tvo „stórlaxa“ í Holunni. Jón Helgi Björnsson á Laxamýri sagði í samtali í kvöld að hann þyrfti að fara að drífa sig niður á „Bjarg“ og tékka, laxinn hlyti að vera kominn í ána, og líklega einhverjir upp fyrir Æðarfossa.
Frá 1.-5.júní opna fjórar ár: Þjórsá þann 1.júní og 4.-5.júní Norðurá, Þverá og Blanda. Síðan koma þær koll af kolli.
