Lokuð sjókví, NASF
Lokuð sjókví. Myndin er fengin af FB síðu NASF.

NASF heldur í dag, fimmtudag, opinn fund þar sem fjallað verður um sjókvíaeldi í lokuðum kerfum. Sjókvíaeldi sem sem kunnugt er einstaklega umdeilt vegna margvíslegra umhverfisþátta og margir hafa bent á að Norðmenn og fleiri sem verið hafa fremstir í flokki í sjókvíaeldi í opnum kerfum séu að hverfa frá því á sama tíma og gríðarlegt kapp er lagt á að koma slíku umdeildu eldi upp hér á landi. Fundurinn er í Norræna húsinu og hefst klukkan 12.00.

Framsögu flytja Rögnvaldur Guðmundsson og Ragnar Jóhannsson. Rögnvaldur Guðmundsson er framkvæmdastjóri AkvaFuture. Hann mun fjalla um sjókvíaeldi í lokuðum kerfum. Fyrirtækið hefur síðast liðin fimm ár þróað fiskeldi í lokuðum sjókvíum norðarlega í Noregi með góðum árangri. Hefur fyrirtækið sótt um starfsleyfi hér á landi og stefna á að framleiða allt að sex þúsund tonn af laxi í lokuðum sjókvíum. Slíkar sjókvíar hafa reynst vel til laxeldis. Þannig koma lokaðar sjókvíar í veg fyrir skaðlega laxalús auk þess sem stórlega er dregið úr umhverfisáhrifum, m.a. botnfalli og því að fiskur sleppi.

Ragnar Jóhannsson er sviðsstjóri fiskeldis og fiskiræktar hjá Hafrannsóknastofnun, með doktorsgráðu í eðlisefnafræði frá Uppsalaháskóla 1993. Hann hefur langa reynslu af stjórnun í rannsóknum, fyrst sem deildarstjóri Umhverfis- og Efnagreininga á Iðntæknistofnun er seinna sameinaðist efnagreinigarsviði RALA undir nafninu Efnagreiningar Keldnaholti og sem sviðstjóri Líftæknisviðs og síðar Erfða- og eldissviðs hjá Matís ohf. Hann hefur stundað rannsóknir á ýmsum sviðum sem tengjast fiskeldi, allt frá árinu 1994.