Veiði í Laxárdal í Suður Þingeyjarsýslu fór vel af stað í byrjun mánaðar, en svo hefur verið frekar lítið að frétta um tíma vegna þess að það eru gloppur í sölu og stundum fáir að veiða. Bjarni Höskuldsson umsjónarmaður svæðisins hefur sagt okkur að það sé uppgangur eftir nokkurra ára niðursveiflu. Við kíktum og erum sammála.
Hluti af VoV teyminu eyddi einni kvöldstund í Dalnum í kvöld(gærkvöldi) eftir að hafa verið í Svartá og á Torfunum og Presthvammi og þessi vangavelta um stöðuna í Dalnum varð skýr. Það er uppsveifla. Mikið líf og stórir fiskar. Jón Eyfjörð greinir frá: „Við fengum sex silunga í kvöld, Bæjarpollur, 63 cm á Rolluna nr. 12, Garðspollur, 59 cm á Glóðin græn nr 12, Ferjuflói, 2 stk, annar 56 cm á Glóðin rauð nr. 12 og hinn 62 cm á Rolluna nr. 12. Tveir í Djújpadrætti, 59 cm á Rektor nr. 6 og hinn á Sunray hexagon 1/2” og krók nr. 8. Samtals 6 stk og vorum við í hæsta máta ánægðir með vaktina, engu logið, mikið líf og fiskar stórir.
Það eru komnir um 220 silungar hér í Dalnum í vor, sá stærsti 71 cm og þá eru fimm stk skráðir 70 cm. Bjarni Höskuldsson segir að hér sé mun meira líf nú en í fyrra. Ég tek undir það, var hér á svipuðum tíma í fyrra og þá og það er ekki líku saman að jafna…”
