Hrikalegur birtingur var dreginn að landi úr Tungufljóti í morgun, þeir verða varla mikið stærri, en þessi mikli höfðingi var mældur 96 cm!
Það var Ólafur Guðmundsson sem landaði ferlíkinu á svokölluðum Flögubökkum, sem eru neðar heldur en hinn frægi veiðistaður Syðri Hólmi. Ólafur er ekki óvanur að glíma við stóra sjóbirtinga, landaði t.d. 90 cm fyrr í vor í Vatnamótunum. Einar Lúðvíksson leigutaki Tungufljóts kallaði tröllið “metfisk” og kæmi ekki á óvart ef að rétt reyndist því sjóbirtingar af þessari stærðargráðu veiðast ekki oft.
Enn sem fyrr er mikil og góð veiði á sjóbirtingsslóðum, sama hvaðan fréttirnar berast.
