Fluguhnýtarinn og veiðimaðurinn Sveinn Þór Arnarson er líklega þekktastur fyrir þungu púpurnar sínar, Glóðina, Rolluna og fleiri sem mokveiða. En hann hefur líka gert það gott með það sem hann kallar útfjólubláar púpur og þar koma Prestarnir sterkir inn….

Veiðislóð heyrði í Sveini og bað hann um söguna af Prestunum og hann sagði: „Prestarnir eru fyrstu útfjólubláu púpurnar mínar, að ég held frá árinu 2000. Það var nú bara þannig að fiskurinn var alltaf að fara í tökuvarann degið frá Airflo sem allir notuðu þá og var og er útfjólublátt og ég var orðinn pirraður á því að fiskurinn djöflaðist alltaf í tökuvaranum en tók ekki púpurnar sem voru undir. Svo ég ákvað að gera púpur úr sömu litum og tökuvarinn var og úr urðu Prestarnir.

Í minni fyrstu veiðiferð sem Presturinn var til var ég í Fnjóská og fór á uppáhalds staðinn minn og byrjaði með bleikan Nobbler sem er útfjólublár og fór að leita að fiskinum því það var mikið vatn í ánni. Ég setti í eina bleikju en hún slapp en þá vissi ég hvar hún lá. Setti þá Phesant tail undir og kastaði og kastaði og setti loks í aðra bleikju en hún slapp einnig. Þá fór bleikja í tökuvarann og ég setti þá undir bleikan Prest og bæng, hann var varla orðin blautur þegar 6 punda bleikja negldi fluguna. Svo fylgdu 5 aðrar 4-5 pund. Og margar aðrar sama dag af öðrum veiðistöðum í ánni. Svo varð það bara þannig að prestarnir voru upp frá þessu alltaf fyrsta fluga undir.

Svo er ein nýlegri veiðisaga. Ég var að veiða í Laxá í Mývatnsveit og vorum við búnir að fá 3 eða 4 urriða á Phesant tail, en ekki búnir að verða varir í hálfan annan tíma og þá setti ég undir órans Glóðina, sem er líka útfjólublá með tveimur slíkum efnum, Þetta var í fyrsta skiptið sem ég reyndi hana, var að vígja hana og bæng í fyrsta kasti 67cm urriði og í þriðja kasti 63cm urriði. Og í 5 kasti 65 cm urriði, en öllum fiski var náttúrlega sleppt.

Málið er það að fiskurinn er með annað sjónsvið en við mennirnir og því glóa útfjólubláu púpurnar í hans augum og vísindin segja að hann sé með útfjólublátt sjónsvið, en það veit engin nákvæmlega hvað hann sér enda ekki hægt að spyrja hann að því. En eitt er þó ljóst,  fiskurinn er brjálaður í allt útfjólublátt, því komst ég að 1997 og það eru til 3 útfólublá efni.“