Elliðavatn
Elliðavatnið er með eindæmum fjölskylduvænt.

Veiðisumarið hefst í Elliðavatni sumardaginn fyrsta, eða á fimmtudaginn, eins og síðustu sumur. Elliðavatn, sem er á mörkum Reykjavíkur og Kópavogs, er eitt vinsælasta silungsveiðivatn á Íslandi.

„Þangað leggja leið sína þúsundir veiðimanna á öllum aldri, sumir að stíga sín fyrstu skref í áttina að fangi veiðigyðjunnar, en aðrir eru komnir á lokasprettinn, en eru samt ævinlega viljugir til að heimsækja Elliðavatnið ár eftir ár , enda er aðdráttarafl vatnsins ómótstæðilegt þeim sem komast í kynni við leyndardóma þess: Ná að ráða gátuna. Á sumardaginn fyrsta, fimmtudaginn 19. apríl hefst veiðin í Elliðavatni enn eitt árið. Vatnið breiðir út faðm sinn og tekur vel á móti yngri veiðimönnum sem hinum eldri,“ segir Ingimundur Bergsson forsprakki Veiðikortsins og heldur áfram:

„Veiðin í Elliðavatni hefur verið mjög góð síðustu sumur og allar líkur á að svo verði einnig í sumar. Veiðikortið, sem er stoltur leigutaki og umsjónaraðili Elliðavatns, býður veiðimenn á öllum aldri hjartanlega velkoma til veiða í Elliðavatni í sumar og hvetur til þess að menn opni veiðisumarið í vatninu og haldi þannig með viðeigandi hætti upp á sumarkomuna; í Elliðavatni á sumardaginn fyrsta! Veiðikortið fæst um allt land, á bensínstöðvum, í veiðibúðum og víðar.“