VoV heimsótti í vikunni eina af lítt þekktari laxveiðiám landsins, en að sama skapi mögulega þá frægustu sökum þess að í henni veiddist fyrir margt löngu ógnarstór lax sem er sá stærsti sem veiðst hefur á stöng á Íslandi. Jú, við kíktum á Bakkaá í Bakkafirði.
Þetta lagðist þannig til að Fishpartner.com tók ána á leigu og átti lausa daga þegar hluti af VoV var að vinna austur á Vopnafirði. Dagur var tekinn frá. Fyrirfram mátti ekki búast við miklu því einstaklega þurrviðrasamt hafði verið á þessum slóðum um all nokkurt skeið og vatnsstaða í ám orðin lág. Þó hafði Kristján Páll Rafnsson hjá Fishpartner verið á ferðinni nokkrum dögum áður, landað þremur löxum og séð fleiri, eða „30 til 40“ eins og hann sagði í samtali við VoV. Kristján hefur stúderað ána síðustu sumur með leigutökuna í huga og sagði hann jafn framt að minna væri af fiski í henni í sumar heldur en í fyrra og hitteðfyrra. En, að hún væri síðsumarsá sem gæti hæglega dottið betur í gang þegar líður nær haustinu.
Tvær stangir eru í Bakkaá og er vel rúmt um þær. Þar sem komið er að ánni er stutt til sjávar. Bleikja er í ósnum og ánni en sú óvenjulega regla er hjá leigutökunum að sleppa ber allri sjóbleikju. Hins vegar má hirða einn lax undir 70 cm. Bleikjufriðunin stafar af því, að sögn Kristjáns Rafns, að fiskifræðingar hafa sagt sjóbleikjuna vera á undanhaldi síðustu árin og því sé þetta framlag til þess að minnka álagið á bleikjunni. Rétt ofan við ósinn er lítill hylur sem geymir oft lax rétt eftir háflæði og stundum er göngufiskur einnig í djúpum hyl undir brúnni. Ofan við brúna rennur áin á eyrum og með hærri grasbökkum á móti malareyrum. Þetta er um það bil kílómeterslangur kafli sem sést allur frá brúnni. Þarna geta fiskar fundist víða, en aðalstaðurinn er ofarlega þar sem rekið hefur verið niður merkið „Veiðisvæði 5“. Þarna er mjög fallegur hylur sem geymir alltaf lax og þar rakst VoV á einhverja fiska. Erfitt samt að segja til um magnið þar sem þeir geta legið vel faldir beggja vegna utan í tröllvöxnum hnaus.
Þó að rignt hefði langþráð um nóttina reyndust laxar þessir lítt samstarfsfúsir, utan að einn renndi sér í gamlan og góðan Þingeying streamer, en snéri við og hætti við. Lét ekki sjá sig aftur. Þetta var stór og leginn fiskur.
Þegar kom að því að ganga upp í gil gerðist veðrið afar óvinsamlegt. Brast á með stífri og kaldri norðaustanátt og dembuskúrir fylgdu. Gangan var samt skemmtileg. Þetta eru einhverjir fjórir kílómetrar að sögn Kristjáns Rafns og endar við ólaxgengan foss. Best er að ganga á gilbrúninni og þar er allt umvafið heiðagróðri og blómskrúði. Ekki hvað síst ber mjög á bláklukkunni, einkennisblómi Austfjarða og svo er þarna mikið af bláberjalyngi og vel hægt að ímynda sér að þegar líða tekur á ágúst sé þarna allt blátt af berjum.
Á leiðinni eru ekki margir líklegir veiðistaðir, en þó nokkrar holur undir hvítfyssi þar sem göngufiskar geta leynst. Tveir staðir á miðri leið skera sig þó úr. Þeir eru merktir með staurnum „Veiðisvæði 11“. Þetta eru tvær fallegar breiður með streng efst. Tekur sá neðri við af þeim efri. Þarna er veiðilegt, en áin kannski helst til vatnslítil að þessu sinni til að halda fiski. Tveir smálaxar lágu þó í neðri staðnum og sýndi annar smáum Sunray áhuga, lyfti sér og elti hana 2-3 fet, en lagðist síðan í bæli sitt á ný.
Enn er drjúgt í fossinn þegar staðið er við hylji nr 11 og rétt þar fyrir ofan er snotur lítill foss sem gæti geymt fisk en gerði það ekki þegar hér var komið sögu. Það leynir sér ekki þegar komið er að efsta fossi. Fallegur foss og augljóslega ófiskgengur. Þarna voru nokkrir laxar, en lesendur okkar verða að afsaka að myndir af svæði 11 og af Fossinum eru teknar af Fishpartnermönnum þar sem skyndilegt ólag var á vél VoV. Þarna var kastað um stund, en versnandi veðrið var ekki til að auka líkur á þaulsetu. Laxar voru reistir en þeir tóku ekki.
Gangan til baka var ekki eins ánægjuleg og gangan upp eftir, svo var fyrir að þakka veðurguðunum. En þetta var áhugaverð og skemmtileg heimsókn í lítt þekkta, en að sama skapi rífandi fræga laxveiðiá sem fáir hafa séð og skoðað. Væri vel þess virði að kíkja aftur næst er leiðin liggur á Norðausturhornið.
