Þær eru margar fallegar sjóbirtingsárnar í Vestur Skaftafellssýslu. Ein þeirra og mögulega sú minnst þekkta er Fossálar, kenndir við Síðu. Fossálar á Síðu. Þar sem ekið er yfir hana á brú á Þjóðvegi 1 er mikil náttúrufegurð, fossar og flúðir og allt vaxið hvönn. Enda er stöðug truflun túrista á vettvangi, þeir stoppa þarna og munda myndavélarnar. Það getur tekið á. En Fossálar eru góð sjóbirtingsá og þar finnst líka þessi stóra Skaftfellska bleikja sem þó hefur gefið eftir síðustu árin. SVFK hefur Fossála á leigu og því er þar víðara svigrúm með agn, Suðurnesjamenn eru þekktir fyrir að vilja nota blandað agn og taka aflann heim með sér í soðið. Ásgeir Ólafsson þekkir vel til Fossála, veiðr þar í það minnsta tvisvar á hverri vertíð og þekkir orðið vel til árinnar.
Ásgeir taldi af hógværð sinni að hann þekkti nú ekki nægilega vel til árinnar til að fara með veiðistaðalýsingu, en sagði okkur þó þetta:
„Ástæðan er sú að það eru ekki svo margir veiðistaðir á Fossálasvæði SVFK sem halda fiski í einhvern tíma að ráði. Af þessum fáu stöðum sem halda fiski þá henta enn færri vel til veiði með flugu. En ég get svo sem gefið mitt álit, stuttlega. Ef við byrjum neðst þá mundi ég segja að það sé misjafnt eftir árum hvort fyrsti vænlegi veiðistaðurinn sé ármót Fossála og Syðri áls eða veiðistaður nr. 8. Stundum myndast fallegur hylur við ármótin sem gefur fiska en önnur ár er þar engan veiðistað að sjá og einungis sandgrynningar. Veiðistaður nr 8 er djúpur og hraður hylur sem gefur árlega nokkra fiska. Þessi staður er í mikklu uppáhaldi hjá sumum sem sækja Fossálana heim ár eftir ár. Þarna fer maðkurinn ansi vel enda botninn bara sandur en þó ekki mjög laus. Einnig virkar spúnninn vel þarna. Erfitt er að notast við fluguna þarna útaf miklum straum og reki.
Næsti staður sem vert er að kanna er nr 12. Framan af sumri er þessi staður ekki almenilega virkur nema í vatnavöxtum og fyrstu klukkutímana eftir að áin hreinsar sig. Seinni part september og að lokun 20. október er hægt að treysta á að þarna sé fiskur. Þetta er fallegur hrygningarstaður sem byrjar í krappri beyju og þar er lítil en oft djúp hola. Sirka 10-15 metrum neðar er nettur en djúpur hylur. Þarna virkar allt. Fer oft skemmtilegur straumur um líkamann þegar maður sér væna sjóbirtingshryggi skera varnsyfirborðið í þessum fallega stað.
Næsti vænlegi veiðistaður er nr. 14. Þetta er staður sem margir renna hýru auga til þegar þeir keyra yfir brúna á þjóðveginum enda virkilega fallegur staður. Svakalega djúpur og langur hylur með fallegri straumrönd. Sýnd veiði en ekki gefin lýsir þessum stað ágætlega. Reyndar er mjög sjaldgæft að maður sjái birtinginn þarna þótt stundum megi sjá þar bleikjur. Birtingurinn er hinsvegar þarna alveg frá því hann byrjar að ganga í ánna í ágúst. Vegna þess hversu stór og djúpur þessi hylur er þá getur reynst mjög erfitt að pirra birtinginn í töku. Spúnn og maðkur gefa yfirleitt meiri veiði þarna en flugan en með smá heppni er alltaf hægt að fá einn og einn á fluguna þarna.
Næsti veiðistaður er nr. 15. Mætti líka kalla hann Brúarhyl því hann er staðsettur beint undir brúnni á þjóðveginum. Oft á tíðum er lítið líf í þessum hyl en í mikklum vatnavöxtum þá verður þetta einn allra besti veiðistaður Álana. Djúpur hylur með sandbotni og þægilegum straumþunga. Birtingurinn sækir í að liggja þarna í vatnavöxtum og tekur mjög vel í litaða vatninu. Þarna er flugan ekki síðri valkostur en hinir tveir.
Veiðistaður nr. 16 er alveg magnaður og margslunginn. Djúpur efst (þar sem hann tekur við eftir langar flúðir) en hægt grynnist hann og endar í fallegri breiðu. Þarna er alltaf slatti af fiski saman kominn og hægt að ganga að honum vísum. Það er hins vegar mjög gaman að sjá hvernig hann ferðast um veiðistaðinn og engan veginn hægt að reikna út ferðir og atferli fisksins. Góð athygli gerir oft gæfumuninn þarna. Maðkur, spúnn og fluga, allt virkar í þessum stað. Mæli samt með því að þeir sem veiða á flugu gefi sér tíma í að læra á staðinn með flugustönginni því verðlaunin eru ríkuleg (fékk 19 birtinga og 3 bleikjur úr þessum stað í sumar í 3 túrum).
Fossinn er næsti veiðistaður nr. 17. Hann er nánast eingöngu hæfur fyrir maðkinn. Mikið hvítfryssi og nokkuð erfiður viðureignar en geymir yfirleitt alltaf fisk. Fyrir ofan foss tekur við svæði sem virðist halda ílla fiski og virðist birtingurinn stoppa lítið í þessu fallega grasi gróna hraunlendi enda engar eiginlegar fyrirstöður fyrir því að hann geti gengið hratt upp ánna.
Efsti veiðistaðurinn, nr 19. er falleg breiða og veiðileg en því miður ekkert mjög gjöful en þó koma alltaf einhverjir á land þarna á hverju sumri. Syðri áll er ekki vatnsmikill og framan af sumri er er lítið af birtingi á ferðinni þarna. En birtingurinn hrygnir þarna í einhverju magni og ætti því að vera hægt að hitta á hann seinni part september og í október. Þarna gildir að veiða vel niður fyrir sig og vonast til að hitta á fisk í sandöldum og littlum holum. Maðkurinn virkar best þarna.
