Elvar Örn Friðriksson, Hölkná í Þistilfirði
Elvar með flotta hrygnu úr Hölknánni...

„Opnendur“ Hölknár í Þistilfirði voru að ljúka veiðum í dag og að sögn þeirra var veiðin lífleg og opnunin „metopnun“ í ánni. Það var ekkert annað.

Elvar Örn Friðriksson, Hölkná
Annar stór og fallegur úr Hölkná. Mynd Elvar Örn Friðriksson.

Við fengum skeyti frá Elvari Erni Friðrikssyni veiðileiðsögumanni sem var þar að veiðum og hann sagði eftirfarandi: „Vorum að klára opnun í Hölkná og fengust 13 laxar á stangirnar 2. Þetta er metopnun í Hölkná og veit á afar gott fyrir sumarið. Þetta voru 12 stórlaxar og 1 smálax.“

Við má bæta að ár í nágrenninu hafa verið með misjafnar opnanir, Sandá verið tiltölulega róleg þó að fiskar hafi náðst þar á land, Ormarsá einnig með lakari opnunardaga en oft áður. Hafralónsá hins vegar lífleg og nú bíðum við eftir tölum úr opnun Svalbarðsár.