Það var búist (eða vonast eftir) flottri byrjun í Vopnafjarðaránum og opnunin þar gefur vissulega góð fyrirheit, en eins og venjulega, þá leiðir tíminn í ljós hvernig allt fer.Selá opnaði fyrr en áður, eða síðasta föstudag.
Eigandinn Jim Ratcliffe hefur verið einn með opnunina og var búinn að landa 12 löxum í gærkvöldi síðan á föstudag, þegar áin var formlega opnuð. Gísli Ásgeirsson, framkvæmdastjóri félags Ratcliffs, Six Rivers Iceland, sagði stöðuna núna mjög sérstaka, lax hefði sést í þó nokkrum mæli fyrir 10-12 dögum og í opnun hefðu veiðst laxar í Stekk, lax hefði tapast í Skipahyl og Rauðhyl og lax stokkið í Bjarnarhyl. Allir eru þeir staðir ofan við fossinn og hefur ekki fyrr veiðst lax í Selá ofan við foss í opnun. 40 laxar hefðu gengið upp stigann, í gegn um teljarann. „Þetta hefur aldrei gerst áður“, sagði Gísli.
Ratcliffe og Six Rivers eru einnig eigendur að vænum hluta í Hafralónsá og þar var opnað, óformlega, síðasta laugardag. Tveir komu strax á land og áin verður skoðuð nánar í byrjun viku.
Hvað Hofsá varðar, Ari Þórðarson sem opnaði ána ásamt fleirum, sagði í gærkvöldi: „Komnir með 8 á land og búnir að missa jafn marga. Fiskur á öllum svæðum, frá Stekkjarfljóti upp í Efra Foss. Áin er í fínu sumarvatni og í fínu standi eftir veturinn.“
