Sjóbirtingur, Varmá
Glæsilegur sjóbirtingur. Mynd -gg.

Stóri dagurinn er á morgun, 1.apríl og til marks um að lífið gengur sinn vanagang þó að sá vanagangur sé ekki alltaf þessi venjulegi vanagangur. Fjöldi möguleika er á veiði frá 1.apríl eins og sést á samantekt veidiflugur.is í færslu hér að neðan, en ljóst er af veðurhorfum að margur hefði heldur viljað byrja í dag en á morgun….og er þó veðrið ekki dásamlegt í dag.

En þetta er það sem margir vorveiðimenn vilja, kalsamt og rysjótt veður þar sem tekist er á við náttúruöflin. Dofnir fingur, hrollur, vosbúð. En í lok dags hlýr kofinn og farið yfir ævintýri dagsins. Það gæti þó orðið langur dagur þegar rýnt er í veðurkortin.

Eins og við höfum stundum gert áður tínum við út fjóra veðurathugunarstaði á vedurstofan.is. Staðsetningin á að gefa til kynna hver staðan gæti verið á nokkrum lykil veiðistöðvum. Kirkjubæjarklaustur er augljós kostur með allar sínar sjóbirtingsár. Þá höfum við valið Árnes, nálægð þar við Minnivallalæk, Ytri Rangá, Varmá o.fl. Húsavík á að gefa til kynna stöðuna við Litluá og Brunná o.fl. og Blönduós á að veita innsýn í ástandið á svæðum eins og Húseyjarkvísl.

Sem sagt, 1.apríl:

Kirkjubæjarklaustur.

Klukkan 06 að morgni, mínus 2, vestan 6 metrar á sekúndu, heiðskýrt.

Klukkan 13, plús 1, vestan 16 metrar á sekúndu, heiðskýrt.

Klukkan 18, mínus 3, norðvestan 14 metrar á sekúndu, heiðskýrt.

Árnes.

Klukkan 06, mínus 3, sv 4 metrar á sekúndu, alskýjað

Klukkan 13, 0 gráður, alskýjað

Klukkan 18, mínus 3, vestan 6 metrar á sekúndu.

Húsavík.

Klukkan 06, mínus 3, norðan 2 metrar á sekúndu, alskýjað

Klukkan 13, 0 gráður, vestan 9 metrar á sekúndu, skýjað

Klukkan 18, -3 gráður, norðan 10 metrar á sekúndu, alskýjað

Blönduós.

Klukkan 06, mínus 2, suðvestan 8 metrar á sekúndu, alskýjað

Klukkan 13, 0 gráður, vestan 9 metrar á sekúndu, skýjað

Klukkan 18, mínus 2 gráður, norðan 11 metrar á sekúndu, lítils háttar snjókoma.

Þar hafið þið það. Kalt og vindkæling í nesti. Klæða sig vel, vindstyrkurinn gæti kallað á skafrenning þar sem enn liggur snjór. VoV mun reyna eftir föngum að afla frétta af afrekum dagsins.