Trylltur Hofsárlax í stærri kantinum. Mynd Nils Folmer.

Vikutölur angling.is birtust í gærkvöldi og má af þeim sjá að víða er góður gangur sem þakka má öflugum smálaxagöngum. Viss svæði eru þó aðeins að tilla þokkalega og hafa ekki fengið jafn kraftmiklar smálaxagöngur. Sumar ár eru betri en á sama tíma í fyrra, aðrar eru lakari. Skilyrði hafa almennt verið góð. Lítum hér að vanda á töluhæstu svæðin og við höldum okkur við þær ár sem að hafa náð þriggja stafa tölu. Tvær eru komnar í fjóra stafi.

Katrín Sæland Einarsdóttir, Laxá í Leirársveit
Katrín Sæland Einarsdóttir að glíma við lax í Laxfossi í Laxá í Leirársveit. Myndina fengum við hjá Hauki Geir Garðarssyni.

Hér kemur listinn og er fyrst heildartalan miðað við miðvikudagskvöldið 18.7. Talan í sviganum er vikuveiðin og loks kemur tala frá sama tíma í fyrra til samanburðar.

Þverá/Kjarrá        1525 (339) – 1238

Norðurá                1125 (291) –  966

Urriðafoss              842 (124)  -583

Miðfjarðará            759 (244)  – 1202

Ytri Rangá                748 (347)  -902

Haffjarðará              722 (235)  -547

Langá                        608 (262)  -731

Eystri Rangá             555 (339)  -201

Blanda                       515 (98)   -745

Elliðaárnar                458 (138)  -503

Laxá í Kjós                 403 (127)  -344

Laxá í Aðaldal           278 (103)  -317

Hítará                         275 (119)  -174

Laxá í Leir.                  266 (90)   -207

Brennan/Hvítá           250 (21)   -190

Laxá á Ásum                241 (64)   -375

Langholt/Hvítá E         236 (82)  – Ekki gefið

Laxá í Dölum                229 (93)  -125

Flókadalsá                     219 (64)  -239

Haukadalsá                    210 (95)  -165

Hofsá                               178 (81)  -134

Vatnsdalsá                      169 (46)  -215

Víðidalsá                          168 (43)  -315

Stóra Laxá                      162 (60)  – 205

Jökla                                115 (77)  -80

Búðardalsá                      108 (38)  -Ekki gefið

Straumfjarðará               104 (32)  -127

Vatnsdalsá, Björn K. Rúnarsson
Kátur veiðimaður með rígvæna hrygnu úr Vatnsdalsá. Myndina tók Björn K. Rúnarsson

Það er eitt og annað eftirtektarvert í þessum tölum. Til dæmis má lesa úr þeim að það hefur vantað allan kraft í smálaxagöngur í Húnavatnssýslunum. Eitthvað hefur það þó verið að rofa til, en tíminn segir til um hversu mikill sá bati verður.

Þá eru Rangárnar tvær á sitt hvorum staðnum. Ytri er að gefa alveg bærilega, en Eystri er miklu mun betri heldur en í fyrra og síðasta vikutala er ansi hraustleg. Miðvikudagurinn einn gaf hátt í 80 laxa og var áin þó ekki fullveidd.

Þá er skondið að sjá hversu samstiga nágrannaárnar Vatnsdalsá og Víðidalsá eru, með nánast sömu heildar- og vikutölur. Báðar að auki lakari en í fyrra.

Þá verður að skoða tölur úr Brennu og Langholti með ákveðnum fyrirvara. Ekki þeim fyrirvara að þetta séu eitthvað hæpnar tölur heldur vegna þess að þetta eru afmörkuð svæði í Hvítánum tveimur. Í Hvítá í Borgarfirði eru gjöful svæði sem eru ekki í tölunni, t.d. Straumar, Svarthöfði og Skuggi. Þá er víðar veitt á stöng í Hvítá eystri heldur en í Langholti. Þá má sjá af vikutölu í Brennu að fiskur stoppar þar ekki eins mikið og framan af, skilyrði verið það góð að laxinn hefur farið hratt upp í Þverá.

Þá er gleðilegt að sjá bata í Vopnafirði, sbr Hofsártöluna. Selá var eina áin sem vantaði á listann, en vikugömul tala úr henni benti til hins sama, að hún væri á góðri uppleið eftir nokkur erfið ár.