Einn þekktasti fluguveiðimaður og fluguhnýtari landsins, Nils Folmer Jörgensen hefur all nokkrum sinnum miðlað reynslu sinni og þekkingu til lesenda okkar. Hér segir hann frá laxaflugulínu sem tileinkuð er hyljum og fólki tengt Nessvæðunum í Laxá í Aðaldal.
Best er að Nils segi sjálfur frá flugum þessum, tilurð þeirra, einkennum og veiðni: “Laxárflugurnar eru allar skýrðar í höfum hylja á Nesveiðunum í Laxá í Aðaldal og fólki tengdum svæðinu, en ég veiði afar mikið á þeim svæðum árinnar og er tengdur bæði ánni og fólkinu sterkum böndum. Þetta er svæði sem grípur mann föstum tökum og sleppir ekki.
Persónulegur stíll minn skín yfirleitt útúr flugunum en bætti klassíska rauða höfuðklútnum Péturs Steingrímssonar við til að gefa þeim það sem við getum kallað heimilislegan blæ. Enn fremur tók ég þekktar heimaflugur eins og Laxá blá og kryddaði með jungle cock og gulum höfuðklút. Einhverjar hafa sagt hana vera nýja flugu en ég lít á hana sem Laxá blá afbrigði. Flugur þessar eru hnýttar fremur klassískar fyrir utan appaelsínugula skógarhanann (jungle cock) sem prýðir mjög margar af laxaflugum mínum.
Ein þessara flugna, Skriðuflúðin, er þó undantekning frá þessu. Ástæðan er sú að síðsumars 2014 og sumarið 2015 var árvatnið í Laxá litað þannig að ég hannaði flugu sem var meira klædd og gædd kröftugri litum til að hressa hreyfingarnar í vatninu og gera hana auk þess sýnilegri.
Þessar flugur eru ekki til skrauts ef að einhver kann að hugsa það. Þær veiða og þær veiða vel sé mið tekið af því hversu stuttan tíma þær hafa verið til og í notkun. Erna hefur verið einna lengst í víglínunni og er ein albesta flugan á Nesveiðunum. Þær flugur sem tilheyra fjölskyldunni eru Beygjan, Erna, Óseyri, Volli, Stíflan og Skriðuflúð. Fleiri eru í pípunum til að stækka fjölskylduna, annað hvort í hönnun eða til reynslu í höndum fárra. Þess ber að geta að orgínalarnir eru allir hnýttir úr íslenskum hrosshárum. Sjálfur hnýti ég þessar flugur og þær má fá í nokkrum af betri veiðibúðunum í Reykjavík.”
