Nýjar flugur eru stöðugt að skjóta upp kollinum auk þess sem aðrar eldri fá andlitslyftingar og ýmis afbrigði sem að halda mönnum við efnið. Það er alltaf gaman þegar þær nýju skila árangri, en þegar ein beinlínis slær í gegn, þá getur það ekki verið tilviljun. Ein slík fluga er nú orðin helsta ein stórlaxaflugan norðan heiða, sérstaklega í Laxá í Aðaldal.
Um er að ræða fluguna Radian sem er eftir hinn landskunna stórlaxahrelli Nils Folmer Jörgensen sem hefur hnýtt þær margar og veiðnar. En hann kynnti Radian til sögunnar sumarið 2014. Það voru ekki margir með hana í boxum sínum og ekki var gert neitt í því að kynna hana sérstaklega. En hún gaf og gaf vel.
En það var sumarið 2016 sem að flugan sló fyrst rækilega í gegn þegar hún var líklega veiðnasta flugan fyrir þá allra stærstu í ánni. Hér er lítil saga frá hinum kunna veiðistað Hólmavaðsstíflu sem segir margt um hversu mögnuð flugan Radian er.
Nils segir frá: -Þetta var júlíkvöld. Tveir leiðsögumenn komu að kvöldi að Stíflunni. Lítið hafði verið að gerast. Annar var með eintak af Radian sem ég hafði látið hann hafa og reyndi hana eftir að þeir höfðu báðir reynt margar flugur án þess að hreyfa fisk. Það var eins og við manninn mælt, sá sem reyndi Radian var strax kominn í fisk. Þeir ýmist eltu, hrifsuðu eða tóku, sumir töpuðust, aðrir náðust á land. Sá sem var með Radian lánaði félaga sínum fluguna og þá urðu umskipti og félaginn lenti í sama fjörinu og félagi hans á undan. Hver laxinn af öðrum sýndi flugunni áhuga. Sá sem ekki var með Radian fékk ekki viðlit.
Alls reystu þeir eða settu í um fjörtíu laxa á þessari kvöldstund og það verður að segjast að skilyrðin voru ekki einu sinni það merkileg. Einn stærsti laxinn úr ánni 2016 var 110 cm dreki og kom á Radian númer 12, flugu sem ég hafði hnýtt fyrir veiðimanninn daginn áður en hann setti í tröllið. Hróður flugunnar jókst og hún seldist upp fljótlega og var illfáanleg. Nú er hún komin ásamt fleirum í fjöldaframleiðsu hjá Jóni Inga á Indlandi og fæst nú, ásamt fleiri af flugum mínum í Veiðivon og Veiðiflugum á Langholtsvegi.
Síðasta sumar jókst hróður flugunnar enn frekar og hún var veiðnasta stórlaxaflugan í Laxá að sögn Nils. Þá var að reyna hana víðar, sérstaklega í ám norðan heiða. Hún gerði það t.d. gott í Víðidalsá þar sem Nils veiddi sjálfur líklega stærsta lax sumarsins, 111 cm hrygnu. Tók hana á Radian nr 12 og með sömu flugu landaði hann auk þess 106 cm hæng klukkustundu áður. Sannarlega geggjaður dagur og fágætt að hrygnur nái slíkri ógnarstærð.
Eins og sjá má af myndunum sem að Nils tók sjálfur, þá er Radian nokkuð langt frá því að vera dæmigerð laxafluga miðað við uppleggið sem hefur verið síðasta áratuginn eða svo þar sem flugur eins og Frances, Friggi, SRS og Snælda skipa efstu sætin. Radian er meira líkt of afturhvarf til þeirra tíma að laxaflugur voru beinlínis skrautlegar og fallegar. Flestar af flugum Nils eru af sama meiði, en eru samt jafn ólíkar og þær eru margar. Með aukinni notkun á slíkum flugum gætum við verið að horfa til afturhvarfs til fyrri ára. Það væri ekki leiðinlegt og gaman að sjá fleiri grípa í þessar flugur auk gömlu meistaraverkana sem að sóma sér flestar afar vel í nútímalegri byggingu.
