Mikið hefur verið rætt um vatnsleysið í ám á vestan- og norðanverðu landinu það sem af er sumri og engar ýkjur að ástandið hefur verið svart. Ein af ánum sem hvað mest hafa fundið fyrir vatnsleysinu er Norðurá í Borgarfirði. Ekki bara að vatnið vantaði, heldur laxinn líka. En kannski er hann fundinn!
Það var kominn reytingur af laxi í ána þegar hún opnaði, en ástandið með vatnið fór hríðversnandi eftir það og lítið bættist við af fiski. Héldu þá margir, að fiskurinn væri að búnka sig upp í Straumunum, líkt og í Brennunni við ármót Þverár, en svo var ekki. Lítið var að frétta úr Straumunum og fóru menn þá að hafa áhyggjur. Var laxinn kannski í sjávarföllunum í Gufuá? Nei, ekki reyndist það vera.
En svo var það í vikunni, að einhver ónefndur náungi sem var í stéttarfélagsbústað í Munaðarnesi ákveð að festa sér dagveiðileyfi á Flóðatangasvæðinu. Veiðileyfið kostaði 3þúsund krónur og af því má ráða að væntingarnar eru ekki miklar. En umræddur náungi var ekkert að velta því fyrir sér og hélt með sína spúnastöng niður að á. Nú vitum við ekki hvort hann bar niður við Haugshyl eða Kastaðahyl, það eitt vitum við að áin er þar straumlítil með djúpum álu. Er skemmst frá að segja að þarna dró kappinn átta laxa í beit og þarna hélt til mikil laxatorfa. Það var nú það! Laxinn fundinn.
