Vatnaveiðin er nú farin að taka við sér eftir kaldan apríl. Þar sem er urriði þá var reyndar yfirleitt veiði að hafa en bleikjan kemur jafnan seinna til, en er nú farin að sýna sig líka. Nefnd hafa verið all nokkur vatnanöfn við okkur, en okkur lék mest forvitni að hlera hvaða flugur silungurinn væri að taka.

Til að mynda er Vífilstaðavatn vaknað, en aðallega þó urriðinn, bleikjan hefur enn verið treg og þar sem spáð er kólnandi veðri á næstunni , gæti enn orðið bið á henni. En við heyrðum t.d. í Ásgeiri Ólafssyni sem landaði tólf urriðum á stuttum tíma. „Flestir tóku rýkmýs púpu númer 14. En ég varð lítið var við bleikjuna, fékk aðeins tvær smáar. Það var mikið af fallegri bleikju í fyrra, vonandi fer hún að gefa sig,“ sagði Ásgeir.

Langskeggur, silungaflugur
Langskeggurinn er geysilega drjúg silungafluga. Mynd Heimir Óskarsson.
Appelsínugulur Nobbler, Nobbler, silungsveiði, silungaflugur
Appelsínugulur Nobbler er sterkur í urriðann í Elliðavatni. Dreginn með stuttum rykkjum. Mynd Heimir Óskarsson.

Sama með Elliðavatn, það hefur komið aðeins til eftir rólega byrjun. Við heyrðum í tveimur sem skruppu um helgina, báðir voru kvöldstund. Annar var mest í nágrenni Riðhóls og var með fjóra urriða, þrjá á Langskegg og einn á rykmýspúpu. Hinn óð út á Engjar og var þrjá, alla á lítinn appelsínugulan Nobbler líkt og þann sem myndin er af, en hann situr þarna á fingurgómi Geirs Thorsteinssonar og var myndaður þar fyrir allnokkrum árum. Nobblerar í ýmsum útgáfum eru góðir í urriðann í vatninu á vorinn. Við heyrðum t.d. af manni sem veiddi nokkra væna fiska fyrir nokkru, nánar tiltekið í lok síðustu viku, og notaði lítinn olífugrænan Nobbler. Allir nefndu að urriðinn væri vænn í ár, talsvert 2-3 punda, en bleikjan sæist lítt enn sem komið er, enda algengt að hún fari að láta á sér kræla í júnímánuði.

Krókurinn, silungaflugur
Krókurinn hefur verið að gefa víða í vor. Myndin er þó ekki ný. Mynd Heimir Óskarsson.

Talandi um bleikju, sjóbleikjan er sögð spræk og fjölmenn í Hraunsfirðinum um þessar mundir. Bjarni Júlíusson sagði okkur að „Glitfló“ hefði gefið vel og einnig Krókurinn og síðan væru flestar útfærslur af marfló gjöfullar. Þeirra á meðal má nefna Phesant tail.

Þá er Hlíðarvatn farið að gefa vel og sýnist mönnum að það sé mikill fiskur þar á ferð nú í vor. Á vefsíðu Ármanna segir t.d. frá félagsmönnum sem lönduðu þrjátíu bleikjum sem voru nógu stórar til að hirða og slepptu að auki slatta. Þeir veiddu mest á Burton, en einnig Phesant tail, Kopar Mola og Rolluna. Þá höfum við heyrt af fleirum sem fengu góðan afla og væna fiska og notuðu Mýslu og Krók.