Þeir eru margir frábæru og fallegu veiðistaðirnir sem fáir vita um og jafnvel enn færri bleytt færi í. Þetta geta verið ár, lækir, tjarnir eða vötn. Einn slíkur staður er við bæjardyr höfuðborgarsvæðisins, heitir Geldingatjörn og er á Mosfellsheiði.
Geldingatjörn er sem sagt á Mosfellsheiði en hefur ekki verið á radar silungsveiðimanna þangað í fyrra, að veiðileyfasalinn Fish Partner fékk það í sínar hendur. Þetta er aðeins lítið vatn , 0,6 ferkílómetrar, í 220 metra hæð yfir sjó og meðaldýpi 3 metrar. Fyrrum var þetta ekki svo, að sögn þeirra Gunnars Arnar Petersen og Sindra Hlíðars Jónssonar hjá Fish Partner. Fyrrum var tjörnin það grunn að hún botnfraus í köldum vetrum og það fyrir vikið enginn fiskur í henni. En framsýni landeigenda var mikil árið 1950, en þá reistu þeir vatnsmiðlunarstíflu við útfall tjarnarinnar og við það hækkaði vatnsborðið það mikið að úr varð hinn ágætasti dvalarstaður fyrir silung. Urriði var fluttur í tjörnina og hann óx og dafnaði það vel að landeigendur gátu nýtt tjörnina til heimilisnota með hófegri netaveiði. Þetta stóð til 1995 að stíflan brast og voru þá dagar urriðans í tjörninni taldir því tjörnin sótti þá í sama gamla farið.
En þetta er skemmtileg saga um lítið yndislegt veiðivatn því árið 2000 reisti bóndinn í Seljabrekku nýja stíflu og flutti urriða á ný í tjörnina. Fyrri stofninn var af „góðum ættum,“ en sá sem nú var fluttur í vatnið var eðal. Hinn eini sanni Þingvallaurriði sem eins og kunnugt er, á rætur að rekja til síðustu ísaldar. Þingvallaurriðinn er sterkur og þrautseigur stofn og náði sér fljótt á strik í tjörninni sem var nú enn á ný orðin hin álitlegasta vistarvera fyrir urriða.
Frá því að urriðinn náði sér aftur á strik var vatnið afar hóflega stundað og aðeins af vinum og vandamönnum landeigenda. Hin hóflega sókn tryggði góðan og öran vöxt urriðans veiddust allt að 16 punda fiskar í vatninu þó að þorrinn sé 2-3 pund sem er afar góð meðalstærð á fiski í vatnaveiði.
„Við höfum ekki verið að kynna þetta svæði svo mikið, en oft farið þangað með erlenda gesti og sýnt þeim. Þeir hafa verið í skýjunum. Oft verið nýkomnir af öðrum svæðum sem við yfir að ráða og lent í ævintýrum þar og fundist Geldingatjörnin vera punkturinn yfir i-ið. Þó er tjörnin að verða æ þekktari meðal veiðimanna innanlands og kannski vegna þess hversu stutt hún er frá höfuðborginni og eins að við höfum byggt þar upp aðstöðu sem höfðar til lítilla hópa, fjölskyldna og/eða vinnustaðahópa. Verið þar með stórt partítjald, grill og bát. Síðast en ekki síst þá upplifa menn að það er furðanlega mikið af vænum urriða í þessu litla og fallega vatni,“ sögðu þeir Gunnar og Sindri
