Jim Ratcliffe er umtalaður maður, enda með auðugustu mönnum veraldar og sá ríkasti á Bretlandseyjum. En hér á landi er hann þó þekktastur fyrir aðkomu sína að jarðarkaupum með laxveiðihlunnindum á norðaustanverðu landinu. Hann á t.d. stóra hluti í Selá, Vesturdalsá, Hofsá og Hafralónsá. Veiðislóð hitti Ratcliffe við Selá í gær.
Ratcliffe kom hingað til lands í gær ásamt þremur börnum sínum til þess að opna Selá. Horfur voru vægast sagt góðar, fallegt vatn í ánni og mikið gengið af laxi. Mátti sjá hátt í hundrað laxa ofan af klettinum norðan við Fosshylinn. Neðar höfðu menn einnig séð umtalsvert af laxi, m.a. í Narra. En ekki er allt sagt því fyrir rúmlega hálfum mánuði lærbraut Ratcliffe sig og var m.a. gert að brotinu með skrúfum. Hann gekk því á vit Selár sárkvalinn og við tvær hækjur. Selá er krefjandi hverjum manni, jafnvel mönnum við hestaheilsu og í góðu formi. Þannig að auðvelt var það ekki fyrir Ratcliffe.
Hann gat þó komið sér í stellingar uppi á téðum hamri og þaðan þandi hann fluguna niður á breiðuna í Fosshylnum og það leið ekki á löngu uns lax tók fluguna með skvetti. Hann var þreyttur um hríð, en losnaði síðan af þegar styttist í löndum. Örfáum köstum síðar var næsti búinn að taka og að þessu sinni gekk betur. Ratcliffe þreytti laxinn ofan af hamrinum en lét stöngina síðan í hendurnar á öðrum sona sinna sem klifraði niður í skoru til að geta leitt laxinn í háfinn sem beið ásamt leiðsögumanni við vatnsborðið.
Ratcliffe lét gott heita í bili og lét veiðiskapinn öðrum eftir, en ræddi næst við Veiðislóð. „Það er mikill heiður að vera hérna og óvenjulegt í raun fyrir mig, því að ég hef aldrei opnað laxveiðiá áður. Og þetta gekk svona ljómandi vel, enda frábær á, frábært kvöld og frábær veiðistaður. Ég hef aldrei fyrr séð jafn marga laxa samankomna eins og í Fosshylnum núna. Ég braut á mér lærlegg fyrir rúmum hálfum mánuði og það gerir þetta erfiðara, en ég á eftir að koma hingað aftur allavega þrisvar í sumar.“
Aðspurður um tilurð þess að hann væri með jafn sterk bönd hér á landi og raun ber vitni svaraði Ratcliffe að hann hefði fyrir allmörgum árum þekkt mann að nafni John Jacobs sem hefði verið fyrirliði í Ryder Cup um skeið og John hefði þekkt Orra og kynnt sig fyrir honum. „Það varð til þess að ég kom hingað til lands og sá hversu magnað land Ísland er. Og það er ekki bara laxinn sem heillar, það eru óbyggðirnar, ósnortin víðerni og náttúra. Það eru ekki margir svona staðir eftir á jörðinni og það eru forréttindi að koma á slíka staði og upplifa þá. Hvað laxinn varðar, á Íslandi færðu heila á til afnota á meðan þú færð svæði í Skotlandi.
Þegar vikið er að jarðarkaupum Ratcliffs á Íslandi segir hann að einu hagsmunirnir sem séu í spilinu séu hagsmunir laxins. „Það eina sem að fyrir mér vakir er að vernda þessa laxa. Maður getur ekki gert allt fyrir þá, t.d. er ekkert hægt að gera fyrir þá í hafinu. En það er hægt að vernda hrygningar- og búsvæði þeirra. Ef að við getum verndað þessa perlur á Norðausturlandi, þá er það laxastofnum þeirra mikilvægt. Það eina sem vakir fyrir mér er velferð íslenska laxins. Ég er heppinn að vera í þeirri aðstöðu að geta rétt fram þessa hjálparhönd,“ segir Ratcliffe.
Því má við bæta að Jim Ratcliffe er flinkur fluguveiðimaður og hefur hann mikinn aðgang að Vesturdalsá sem er honum mjög kær. Það er skemmtileg veiðisaga af honum frá síðasta sumri og segir til að hann sé ekki mikið fyrir að flækja hlutina. Sem sagt, í fyrra landaði hann 98 löxum í Vesturdalsá í ferðum sínum í hana. Hann veiddi hvern einasta lax á sömu fluguna, sem er margumtöluð Skáskorinn Skuggi. Ef það var viðrað við hann að skipta um flugu, horfði hann rannsakandi á viðkomandi og gaf svarið: Til hvers?
