Veiði er nú lokið í Selá og Hofsá og spurt er hvort að eitt og annað bendi til að þær séu á leið uppúr þeim öldudal sem þær hafa taldar vera í. Kunnugir segja teiknin góð en ekkert sé öruggt….skoðum tölfræðina og vangavelturnar.

Tökum Hofsá fyrst, þar má segja að „ástandið“ hafi verið verra en í Selá. Taka verður ævinlega með í reikninginn að ár á þessum slóðum skoppa alltaf upp og niður með reglubundnum hætti og Vopnafjörðurinn er ekkert einn um það.

En Hofsá endaði tímabili 2017 með 589 laxa í bók. Á mælikvarða Hofsár er það rýr eftirtekja, en samt er það 97 löxum meira en í fyrra þegar aðeins 492 laxar veiddust. VoV ræddi það sumar við grjótharða leiðsögumenn eins og Sigurð Héðinn (Sigga Haug) og þeir hristu hausinn yfir harðlífinu. Sögðu lítið af laxi í ánni og næstum enginn smálax.

En hvernig mælast þessi sumur við fyrri sumur, hví þessi orðræða um niðursveiflu? Til að svara því, skoða:

2017      589 laxar

2016      492 laxar

2015      515 laxar

2014      657 laxar

2013     1160 laxar

2012     1008 laxar

2011      956  laxar

2010     1046 laxar

2009     1143 laxar

2008     1119 laxar

2007     1435 laxar

2006     2023 laxar

Auk þess má nefna að sumrin 2002 til 2005 gáfu 1483 til 1911 laxa. Það er því úr háum söðli að detta fyrir Hofsá. Þó að ekki sé sanngjarnt að miða við toppárin, þá sýnist það skammlaust þarna á meðan að áin heldur sig um og yfir þúsund laxa, en allra síðustu sumrin hefur hún farið vel niður fyrir það og botninum var náð í fyrra þegar 492 laxar veiddust.

Og þá að Selá, hún hefur fylgt Hofsá í þessum efnum, en ekki dýft sér eins djúpt. Í sumar veiddust 973 laxar, 143 löxum meira en í fyrra.

Ef við skoðum síðustu árin eins og með Hofsá hér að ofan, þá var þetta svona:

2017      973 laxar

2016      830 laxar

2015    1172 laxar

2014    1004 laxar

2013    1664 laxar

2012    1507 laxar

2011    2021 lax

2010    2065 laxar

2009    1993 laxar

2008    2025 laxar

2007    2225 laxar

2006    2740 laxar

Hár söðull þarna líka til að detta úr. Sveiflan á milli besta árins og þess lakasta er 1910 laxar. En Selá hefur haldið betur standard. Þórólfur Antonsson fiskifræðingur kom með þá kenningu forðum að niðursveiflan í Hofsá hefur átt rætur að rekja til ofsetningar seiða og of mikla hrygningu í góðu árunum. Þó að Þórólfur sé virtur á sínu sviði og hafi byggt þetta álit á gögnum þá hefur VoV aldrei heyrt í nokkrum manni sem kaupir þetta.

Gísli Ásgeirsson, framámaður í Streng, sem leigir báðar árnar segir að sjá hefði mátt augljósan bata í báðum ánum á nýliðnu sumri. „Það var meira af laxi í þeim báðum og í Hofsá var hann mun betur dreifður heldur en í fyrra, það var fiskur víða. Hins vegar ætla ég ekki að segja hér og nú að við séum komnir með þær yfir það versta, það geta alltaf komið skakkaföll sem rekja má til árferðis og aðstæðna. Það sem ég tel að sé það augljósasta er, að sjávardauðinn virðist hafa aukist, hvernig sem á því stendur. Það er ekkert sem við getum gert í því annað en að gera allt sem í okkar valdi stendur til að koma sem flestum seiðum úr ánni til sjávar. Því fleiri sem komast til hafs, því fleiri skila sér og við minnkandi heimtur úr hafi skiptir það meira máli en nokkru sinni fyrr,“ sagði Gísli