Það hefur að sjálfsögðu vakið mikla athygli að á sama tíma og laxveiðin er í lægstu lægðum, þá eru nokkrar ár á Norðausturhorninu sviapaðar og í góðu sumri í fyrra, eða jafnvel hærri. Þetta á aðallega við Selá, Hofsá, Miðfjarðará og Jöklu.
Gísli Ásgeirsson framkvæmdastjóri Six Rivers sem hefur með flestar árnar á þessum slóðum að gera segist ekki geta nefnt neitt eitt til að styðja að árnar á þessum slóðum standi sig betur. „Ef að þetta hefði eingöngu með landshlutann að gera þá mætti alveg spyrja sig hvers vegna ár eins og Sandá og fleiri séu þá ekki með betri tölur en raun ber vitni. En hjá okkur eru Hofsá og Miðfjarðará á pari við síðasta sumar og Selá eitthvað um 30 prósent betri. Og veiðitölur segja eiginlega ekki alltaf alla söguna, Miðfjarðaráin okkar er t.d. viðkvæm fyrir miklu þurrkum og það hefur verið mjög þurrt á þessum slóðum í sumar. Áin er orðin vatnslítil og erfið eftir því. Samt er hún með tölu jafna á við Laxá á Ásum miðað við tölurnar hjá angling.is. Það hefði einhvern tíman þótt vera saga til næsta bæjar. Og þegar maður sér tölurnar víðast hvar af landinu og menn eru að vonast eftir því að það glæðist eitthvað seinni partinn, þá er ekki eins og menn skynji almennilega hversu rosalega grafalvarlegt þetta ástand er. Maður stoppar við tölu úr Gljúfurá í Borgarfirði. Komnir fjórir laxar eftir mánaðarlanga veiði. Af hverju er henni ekki lokað? Ég bara skil þetta ekki.“
En svo er Haffjarðará á prýðilegu róli mitt í allri niðursveiflunni?
„Já. Hvað sem vísindin kunna að segja við slíku, þá eru alltaf undantekningar og frávik og ekki alltaf gott að segja hvernig svoleiðis er tilkomið. En þegar maður sér Haffjarðará pluma sig þá mætti freistast til að draga línu milli áa sem farið hefur verið um með silkihönskum og hinna sem hafa verið kreistar eins og sítrónur. Og þessar tölur allar, úr flestum ánum, þær eru ógnvænlegar. Laxá í Aðaldal var að koma hægt til baka, en ætli hún nái 400 löxum í sumar? Þar reiknast til að lax per stöng sé 0,2 á dag, það þýðir að það geti tekið þig fimm daga að landa þar laxi.“
En hvað með kenningar um að vetrarskotin í júní í fyrra hafi drepið eða tafið gönguseiði? Og ef svo var, hvers vegna kemur það ekki niður á ykkar ám?
„Við erum alveg að fá smálax og það er ekkert launungarmál að hann er smár í ár. Þeir eru sumir alveg niður fyrir 50 cm. Það bendir til að þeir hafi farið seint út í fyrra og vanti kannski mánuð af næringu í hafinu. En við höfum tekið talsvert af hreistursýnum og fáum nánari vitneskju þegar búið verður að lesa úr þeim. En hvers vegna skil á smálaxi virðast betri hjá okkur á sama tíma og við fengum júníhretin óþvegin eins og aðrir í hausinn, ég get bara ekki svarað því. Nema kannski á þann hátt að aðgerðir okkar og vinna hafa miðað að því að auka hrygningu og seiðaframleiðslu. Og við erum kannski að skila miklu fleiri seiðum út í hafið en áður var. Kannski að það svari einhverju. En það er eitthvað, kannski erum við að uppskera eitthvað út á hvað við höfum verið að sá.“
