Laxá í Dölum, Hreggnasi
Við Laxá í Dölum. Myndin er frá Hreggnasa.

Veiðifélagið Hreggnasi og Veiðifélag Laxár í Dölum hafa framlengt leigusamning sinn og verður Hreggnasi því áfram með ána, en félagið leigði ána fyrst sumarið 2014.

Hreggnasi sendi frá sér fréttatilkynningu um þennan gjörnin og þar stóð meðal annarra orða: „Á dögunum var undirritaður samningur á milli Veiðifélagsins Hreggnasa annars vegar og Veiðifélags Laxdæla hins vegar, um áframhaldandi leigu þess fyrrnefnda að Laxá í Dölum næstu árin. Samstarf félaganna tveggja nær aftur til ársins 2014, en þá hófst leiga Hreggnasa að vatnasvæðinu. Markviss uppbygging á laxastofni árinnar hefur átt sér stað síðan þá, meðal annars með breytingu á veiðifyrirkomulagi, stangarfjölda og fiskrækt.

Laxá í Dölum er á efa meðal bestu laxveiðáa landsins. Hún rennur um söguslóðir í Laxárdal og fellur til sjávar skammt sunnan Búðardals. Veitt er á fjórar til sex stangir og er gott veiðihús til afnota fyrir gesti við Þrándargil. Meðalveiði undanfarinna þriggja ára er mjög góð eftir mögur ár á undan, eða tæplega 1.400 laxar. Þetta er með hæstu veiði á landsvísu sé miðað við afla á hverja dagsstöng.

Veiðifélagið Hreggnasi ehf var stofnað árið 2000 af feðgunum Jóni Þór Júlíussyni og Júlíusi Jónssyni. Félagið byrjaði með eitt veiðisvæði en í dag bjóðum við viðskiptavinum okkar upp á fjölbreitta kosti víðsvegar um landið. Meðal þeirra eru Hafralónsá, Laxá í Kjós, Brynjudalsá, Grímsá og Tunguá, Laxá í Dölum, Krossá á Skarðsströnd, Svalbarðsá og Hofsá í Vopnafirði.“