Frúin, Ingibjörg Svansdóttir, að glíma við stórlaxinn í Teljarastreng.

Það mokast kannski ekki upp lax, en það mokast inn veiðisögur héðan og þaðan. Kjartan Ingi Lorange deildi t.d. einni frábærri í dag þegar hann sagði frá morgunvakt í Bæjarlæknum með eiginkonu sinni Ingibjörgu Svansdóttur, sem gerði sér lítið fyrir og landaði Maríulaxi sínum, 87 cm!

Hér hampar Kjartan Ingi hængnum um það bil sem hann sleppti honum. Myndina tók Ingibjörg Svansdóttir.

Kjartan sagði: „Þessi morgun byrjaði eins og allir morgnar eiga að byrja, með veiði og góðum félagsskap. Betri helmingurinn skellti sér með mér í Elliðaárnar í morgun og sýndi og sannaði að veiðigyðjan er henni sannarlega hliðholl. 87cm hængur var tekinn á Undertaker no 16 í Teljarastreng, eftir mælingu or stutta myndatöku var honum skilað til síns heima á ný. Svo gaf hún einum að borða smá maðk í Stórafossi, 64 cm hængur endar á grillinu, hann tapaði þeirri atlögu. Þetta er lífið og svona á maður að lifa því!“