Það er ævinlega líf og fjör í umræðunni um núverandi og komandi sjókvíaeldi í íslenskum fjörðum, þegar ljóst varð að nýrnaveiki hefði fundist í laxaseiðum fyrir vestan, sendi LV frá sér eftirfarandi fréttatilkynningu.

vididalsa-regnbogi-1
Pattaralegur regnbogi veiddur í íslenskri á, þó ekki á þessu sumri….

„Landssamband veiðifélaga lýsir miklum áhyggjum af þeim staðfestu fregnum frá Matvælastofnun (MAST) að nýrnaveiki hafi greinst í sumar og haust Í tveimur af stærri seiðaeldisstöðvum á Vestfjörðum. Eru þær fregnir í sterkri andstöðu við það sem haldið hefur verið fram að Íslenskt fiskeldi sé sjúkdómafrítt og ógni ekki stofnum villtra fiska. Þá harmar landssambandið að ekki hafi verið upplýst um að sjúkdómar hafi komið upp í umræddum stöðvum strax í vor, heldur hafi þurft eftirgrennslan fjölmiðla til. Þessi atvik sýna svart á hvítu hvers megi vænta við þá aukningu sem er að verða á laxeldi á Íslandi. Sýktir eldisfiskar sem sleppa eru mikil ógn við íslenska laxastofninn.
Þá er áhyggjum lýst yfir augljósri andstöðu fiskeldisfyrirtækja við að framfylgja lögum og reglum um upplýsingaskyldu, sem og þeim blekkingarleik sem stundaður er af þeirra hálfu. Fyrst er fullyrt að engir fiskar sleppi úr sjóvkíaeldi. Þegar það gerist, upplýsa fiskeldisfyrirtæki það nær aldrei og segja þá að aðeins sárafáir fiskar sleppi. Staðreyndir tala sínu máli og augljóst er að mikið magn eldisfiskjar er að sleppa úr sjókvím og þessi erfðamengaða ógn við íslenska náttúru veiðist um allt land þrátt fyrir að fáir vilji kannast við að hafa misst fisk. Þá er fullyrt að eldið sé sjúkdómafrítt en aftur virðist það vera líka rangt en tvær af stærstu seiðaeldisstöðvum landsins eru með nýrnaveiki. Það er í alla staði grafalvarlegt og gefur skýrt til kynna að eldið er langt frá því hættulaust villtum stofnum.
Landssambandi krefst þess að ekki verði frekari leyfi til eldis gefin út fyrr en farið hefur fram ítarleg áhættugreining á eldi frjórra norskra laxa með tillit til mengunar, sjúkdóma og erfðamengunar.“