Út er komin stórmerkileg bók. Nafn hennar er „Á fiskivegum“ og undirtitillinn Laxastigar og laxalíf Vífils Oddssonar verkfræðings, og er skrásetning Þórs Sigfússonar. Verkfræðingurinn Vífill hefur hannað stóran hluta fiskvega á Íslandi og hér er sagan rakin.
Vífill hefur komið að gerð furðu margra fiskvega hér á landi og þekktastur er hann fyrir aðkomu að risaverkefninu að gera Langá á Mýrum laxgenga alveg upp að Langavatni. Hann er líka í Streng sem hefur gerbreytt Selá í Vopnafirði, annars vegar með stiga í Selárfossi og hins vegarí Efrifossi. Báðar eru árnar í röð bestu laxveiðiáa landsins og bötnuðu margdfalt við umræddar fiskvegagerðir.
Fiskvegir eru óvenju algengir hér á landi miðað við nágrannalöndin og ekkert skrýtið ef út í það er farið, landið er hálent og hallar skart fram. Fiskvegagerð hér á landi hefur aukið hrygningar- og búsvæði laxa um 40 prósent frá árinu 1932 þegar ævintýrið byrjaði. Vífill hefur komið að ótrúlega mörgum laxastigum á löngum ferli sínum og segir í bókinni frá aðkomu að fiskvegum í Langá, Selá, Víðidalsá, Gljúfurá, Miðfjarðará í Bakkaflóa og Ytri Rangá.
Við lokum þessu með lýsingu Vífils á því hvernig stigagerðin í Selárfossi virkaði þegar upp var staðið: „Þá gerðist það. Pabbi var við Skipahyl. Búinn að setja út maðkinn og flotholtið og beið sallarólegur á þessum fallega stað, að hann sofnaði. Allt í einu var rykkt í stöngina, pabbi rauk á fætur og litlu síðar lá myndarlegur Selárlax á árbakkanum. Fyrsti Selárlaxinn fyrir ofan foss var kominn á land. Það var mikil gleði þegar pabbi veiddi þennan lax í Skipahyl og glatt á hjalla á Leifsstöðum um kvöldið.Ég veiddi svo annan laxinn fyrir ofan Skipahyl. Staðurinn var naflaus og það hafði verið ákveðið að sá sem veiddi fyrsta fisk á stað , sem ekki hafði nafn, fengi nafn sitt á hylinn. Þannig varð til Vífilsfljót.“