Margir hafa eðlilega verið uppteknir af mun betri laxveiði þetta árið heldur en síðustu ár. Það er að að sjálfsögðu vel. En þótt liðið sé nokkuð vel á sumarið og haustið á næsta leyti (þó að í margra huga sé það löngu komið) þá ber nokkuð á rígvænum silungum. Skoðum það aðeins.
Minnivallalækur er t.d. frægur fyrir sína stóru urriða og einn slíkur veiddist fyrir skemmstu og annar enn stærri sást á sveimi. Vitnum aðeins í Þröst Elliðason leigutaka árinnar: „Þeir stóru er enn til í Minnivallalæk eins og erlendi veiðimaðurinn Frederik Ruegger komst að raun um nýlega. Eitt kvöldið landaði hann 80 cm urriða og sá stærri líka eins og hann segir hér í skilaboðum. Fiskinn fékk hann á svartan Zonker straumflugu og þann sem var enn stærri, að hans mati um 90 cm, var ofan frá veiðihúsinu séð. Mætti ætla að það hafi verið efst á Húsabreiðu.
Minnivallalækur hefur breyst talsvert í eðli sínu síðustu árin. Því tímabili er lokið að fóðurleifar runnu frá seiðaeldinu á vesturbakkanum út í hylinn og risaurriðar lágu í röðum fyrir neðn rörið og hámuðu þær í sig. Og stækkuðu og stækkuðu. Enn er Stöðvarhylur besti veiðistaður árinnar en eðli hans hefur breyst. Og það hefur komið skemmtilega á óvart að áin fóstrar flottan stofn þar sem einstaklngar verða stórvaxnir þrátt fyrir að lokað hafi verið á matargjöfunum frá seiðaeldinu. Áin hefur reynst algeralega sjálfbær og þótt að 12-20 punda fiskar séu ekki alveg eins algengir og fyrrum, þá er þarna góður stofn af vænum fiski….og einn og einn öldungur í bland eins og nýjasta dæmið sannar.
Og talandi um stóra silunga. við höfum pikkað upp tvær myndir af FB síðum, önnur er af sannkallaðri risableikju sem veiddist í vikunni í Ásgarði í Soginu og hin er af Teiti nokkrum Baldurssyni með 65 cm sjóbleikju af svæði 5 í Eyjafjarðará. Seinni myndina fundum við á FB síðu Jóns Gunnars Benjamínssonar sem er öllum hnútum kunnur í Eyjafjarðará. Þá höfum við haft spurnir af veiðimanni sem fer vítt og breytt með Veiðikortið. Hann fór m.a. í Sauðlauksdalsvat og fékk nokkrar fallegar sjóbleikjur. Þar á meðal tvær 5 punda. Og þriðji 5 pundari dagsins hjá honum var staðbundinn urriði. Sami veiðimaður er líka búinn að landa nokkrum 3-4 punda sjóbleikjum í Hraunsfirði og 6 punda bleikju í Úlfljótsvatni. Ekki að spyrja að gildi Veiðikortsins.
