Veiðivötn fara vel af stað

Veiðikappar með fallegar bleikjur úr Langavatni. Mynd Bryndís Magnúsdóttir.

Fínasta veiði hefur verið í Veiðivötnum frá opnun 18.júní. Fyrstu tölur verða þó ekki birtar fyrr en um helgina. En hér getur að líta smá fréttastubb af vefsíðu Arnars Óskarssonar um Veiðivötn.

„Veiði í Veiðivötnum hófst laugardaginn 18. júní. Vegir um svæðið eru víðast greiðir og vöðin yfir árnar góð. Þó er aðalleiðin upp með Litlasjó enn teppt ofan við fyrstu vík en hægt að aka fjöruna. Há vatnsstaða er í Hraunvötnum, Litlasjó og Ónýtavatni og margir góðir veiðistaðir komnir undir vatn sem voru langt uppi á landi í fyrra sumar.

Það sem af er hefur veiðin verið ágæt. Stóra Hraunvatn hefur gefið vel og eins er stór og falleg bleikja í Langavatni, Eskivatni og Breiðavatni. Í Snjóölduvatni og Nýjavatni er fín veiði en bleikjan smærri. Litlisjór og Grænavatn hafa gefið góða fiska. Fyrstu veiðitölur verða settar á vefinn næsta sunnudag.“