Jóhann Davíð Snorrason framkvæmdastjóri hins nýja félags.

Nýtt fyrirtæki á veiðileyfamarkaði hefur verið stofnað og ber það nafnið Kolskeggur. Nafnið er tilhlýðilegt þar sem það á sér ríka tengingu við Njáluslóðir þar sem veiðisvæði Kolskeggs er að finna. Jóhann Davíð Snorrason, sem verið hefur sölustjóri hjá Lax-á fer fyrir hinu nýja félagi. Veiðiferðaskrifstofan Roxtons er því horfin af sviðinu.

Í fréttatilkynningu sem Jóhann sendi á ritstjórn VoV segir eftirfarandi: „Sumarið 2020 tók nýtt félag við rekstri og sölu veiðileyfa fyrir Eystri Rangá sem ber nafnið Aurora Sporting ehf. og er Peter Rippin framkvæmdastjóri félagsins og einn eigenda. Peter hefur mikla reynslu á veiðileyfamarkaði og hefur verið viðriðinn bransann í yfir 20 ár.

Kolskeggur er dótturfélag Aurora Sporting og er Jóhann Davíð Snorrason framkvæmdastjóri þess. Jóhann Davíð er reynslubolti í sölu veiðileyfa og markaðssetningu.“ Þá bætti Jóhann Davíð við í samtali við VoV að þessi breyting á starfsvettvangi hans hefði ekki að svo stöddu áhrif á starf hans hjá Lax-á.

Veiðisvæði Kolskeggs eru eftirfandi:

Eystri Rangá

Enn fremur segir í fréttatilkynningu frá Jóhanni: „Kolskeggur mun sjá um sölu veiðileyfa í Eystri Rangá á tímabilinu 01.07. – 20.10., allar stangir fram til ársins 2023 en þá mun félagið selja í ána frá opnun tímabils til enda. Gerður hefur verið nýr langtímasamningur um leigu veiðiréttar á ánni til ársins 2032. Við höfum átt frábært og gott samstarf við bændur fyrsta árið og hlökkum til áframhaldandi vinnu með þeim.

Við breyttum reglum í Eystri fyrir tímabilið í ár og ekki er hægt að segja annað en að það hafi gefið góða raun. Eingöngu var leyfð fluguveiði fram til 20.08. og hóflegur kvóti var settur á eða 4 laxar á stöng á dag. Þetta hafði þau áhrif að meira var af fiski til skiptanna og vel veiddist í ánni langt fram á haust. Áin er nú að skríða yfir 8600 laxa veiði sem er alger metveiði. Árið 2021 verða sömu reglur í gangi nema hvað maðkaopnun verður nú 1.09. eða aðeins seinna en í ár.

Hólsá Austurbakki

Við höfum nýlega skrifað undir samning til 10 ára um leigu á Austurbakka Hólsár. Við hlökkum mikið til að geta boðið upp á þetta skemmtilega veiðsvæði sem nálgast 900 laxa veiði í ár auk þess sem góð sjóbirtingsveiði er líka í kaupbæti. Hólsá er veidd með sex stöngum á svokölluðu aðalsvæði en tvær stangir eru að auki á ósasvæði sem er spennandi kostur sem hefur verið lítið stundaður. Frábært veiðihús fylgir með Hólsá þar sem eru sex tveggja manna herbergi, öll með sér baði, heitur pottur og allt til alls sem gerir Hólsá góðan kost fyrir stórfjölskylduna eða veiðihópinn.

Smávægilegar breytingar verða gerðar á veiðireglum í Hólsá fyrir næsta ár. Þannig verður settur á sami kvóti og í Eystri Rangá eða 4 smálaxar á vakt á stöng en öllum sjóbirtingi og stórlaxi ber að sleppa. Áfram verður leyft að veiða með flugu, spún og maðk á svæðinu.

Affall í Landeyjum

Kolskeggur mun hafa umsjón með og selja veiðileyfi í Affall í Landeyjum. Affallið er skemmtilegt veiðisvæði sem veitt er með fjórum stöngum og fylgir ágætt sjálfmennskuhús með ánni. Stórkostleg veiði var í Affallinu árið 2020 og er áin nú í fjórða sæti yfir bestu veiðina á landinu með um 1700 laxa veidda. Við erum mjög ánægð að geta boðið upp á þennan frábæra kost til viðskiptavina okkar. Áfram verður leyft að veiða með flugu og maðk í Affallinu en kvóti verður 4 laxar undir 70 cm á stöng á vakt.

Fleiri spennandi veiðisvæði eru jafnvel í vinnslu en ekki föst í hendi þegar þetta er skrifað. Á næstu dögum mun vefsíðan kolskeggur.is opna þar sem hægt verður að skoða allt um þessi frábæru veiðisvæði og þar mun einning verða öflug vefsala.“

Veiði á öllum þessum svæðum hefur byggst á sleppingum gönguseiða. Einar Lúðvíksson sá um árabil um sleppingarnar, en aðkomu hans lauk eftir sleppingarnar 2019. Jóhann Davíð sagði enn fremur í spjalli við VoV að eftir sem áður væri farið eftir módeli Einars við sleppingarnar og að jafn miklu hafi verið sleppt í vor og í fyrra og með sama hætti.