María Valgarðsdóttir með fallegan lax af Skriðuvaði í Vatnsdalsá, fyrsti lax sem hún veiðir á flugu. Myndina tók BJörn K.Rúnarsson og við fengum hana á FB síðu Vatnsdalsár.

Vikutölur angling.is voru flestar komnar í hús í morgunsárið. Þó ekki allar. Afli síðustu viku segir auðvitað heilmikið, en auðvitað taka aðrar aðstæður en fiskimagn til sín, svo sem illviðrið sem geysaði vænan hluta vikunnar. Rangárþing ber af, en nokkrar á á Vesturlandi tóku vænan kipp og Norðausturhornið er eins og fyrri daginn líflegt.

Kristín Edwald með glæsilega hrygnu úr Jöklu.

Rennum hér í gegn um lista yfir aflahæstu árnar, fyrsta talan fyrir eftir hverja á er heildartalan miðað við í lok gærdagsins, 22.júlí. Talan í sviganum er síðan hin mikilvæga vikutala. Og auðvitað er Eystri Rangá lang efst:

Eystri Rangá               2275 (703)

Ytri Rangá                   897   (322)

Urriðafoss                    657  ( 24 )

Miðfjarðará                  540   (203)

Þverá/Kjarrá                477   (129)

Haffjarðará                  428    (112)

Langá                          385   (110)

Laxá í Kjós                   325  (122)

Selá                             308   (171)

Hofsá                           276   (91)

Laxá á Ásum               275    (87)

Blanda                         262    (75)

Elliðaárnar                   222    (55)

Hítará                           210   (77)

Jökla                             202   (114)

Laxá í Aðaldal              185    (42)

Grímsá                          184   (47)

Skjálfandafljót               149   (56)

Vatnsdalsá                    122   (31)

Árnar hér að ofan eru þær sem komist hafa í þriggja stafa tölu og voru með nýja tölu sem miðaðist við að kvöldi 22.7. Svæði sem vantar þarna inn á við skráningu þessa texta eru Norðurá, Laxá í Leirársveit, Víðidalsá, Brennan og Straumar, allt svæði í þriggja stafa tölu, því gæti þessi listi að ofan riðlast þegar nýjustu tölur berast loks frá umræddum svæðum.

Glöggt má sjá að Rangárþing, sérstaklega hið eystra, en þó í vaxandi málið hið Ytra líka er heitasta svæðið. Þá er ánægjulegt að sjá að nokkrar ár á Vesturlandi eru með ágætis gang, t.d. Laxá í Kjós, Haffjarðará og Langá. Norðaustanlands er góðar vikutölur, kannski flottast að þessu sinni í Jöklu og Selá. Miðfjarðará er sem fyrr með höfuð og herðar yfir ár á Norðvesturlandi, en tölurnar sýna að víða er rólegt. Veðurfar og eins, að kannski í ekki fullmannað alls staðar við veiðiskapinn vegna Kórónuforfalla. Þá stingur Urriðafoss vissulega í stúf, þar hafði verið blússandi veiði, fín skot líka á tilraunasvæðunum, sérstaklega á Urriðafoss B, en óveðrið með tilheyrandi vatnavöxtum hefur aflaust spilað þar inn í.