24 pundari á land – annar stærri sleit flugulínu!
Ari Hermóður með laxinn sinn og félagarnir samgleðjast. Mynd frá Árna Pétri Hilmarssyni.
Það er enginn endir að því er virðist á stórlaxasögum úr Laxá í Aðaldal. Áin er full af 20plús þungum löxum og það líður varla sá dagur að einhvers staðar í ánni sé ekki í það minnsta einn drifinn á land. Í morgun hélt veislan áfram með 105 cm hæng.
Árni Pétur Hilmarsson sendi okkur skeyti eftir eftirminnilega morgunvaktina og sagði: „Veislan heldur áfram á Nesveiðum. Í morgun komu 7 fiskar og þar af einn 105cm vigtaður 12kg. Veiðimaðurinn var Ari Hermóður Jafetsson og var hann að rjúfa 20p múrinn í fyrsta skipti. Flugan var Dimmblá keilutúba 1/2 tomma. Veiði hefur verðið gríðarlega góð, síðustu tvö þriggja daga holl enduðu í 40 löxum og 34 löxum. þetta er sjötti laxinn á nokkrum dögum sem landast í stærðarflokknum 104 cm -110 cm og eru þá ótaldir allir venjulegu stórlaxarnir 75-95 cm. Nokkrir laxar eru á sveimi sem eru í algjöri yfirstærð og misstist einn í morgun í Höfðahyl sem var klárlega yfir 30 pund en hann endaði með að slíta flugulínu veiðimannsins eftir u.þ.b. 10 mín. baráttu."
