Net full af fiski í Norðurá
Eitt netanna komið á þurrt og í því eru nokkrir vænir silungar.Myndirnar tók Kristján Páll Rafnsson.
Veiðimenn sem voru að veiðum á Flóðatangasvæðinu í Norðurá í vikunni gengu fram á nokkur net í ánni sem telst með miklum ólíkindum. Nokkrir sjóbirtingur voru fastir í einu netinu. Veiðivörður var kvaddur til, en formaður veiðifélagsins segir að um misskilning hafi verið að ræða.
Það voru Kristján Páll Rafnsson og félagar sem gengu fram á netin. Við gefum honum orðið: „Við vorum að veiða á Flóðatanga þann 25.ágúst þegar að ég labbaði fram á 3 net í Kastalahyl, þetta var ömurleg sjón og alveg til að skemma túrinn. Í einu netanna voru 6 sjóbirtingar eins og sést á myndin ni en á hinni myndinni sjást brúsarnir sem halda einu netanna uppi. Ég lét veiðivörðinn strax vita og hann fór í málið, síðar fékk ég að vita að þetta væri misskilningur. Mér finnst erfitt að trúa því og ég opnaði þráð á spjallsvæði SVFR. Þar kom fram útskýring Birnu Konráðsdóttur á Borgum, sem er formaður Veiðifélagsins.“
Sönnunargögnin á þurru.
Birna skrifaði: „Ég sé mig knúna til að leggja orð í belg í þessari umræðu þar sem nafn mitt hefur tvívegis borið hér á góma. Ég harma mjög að veiðimenn í Norðurá skyldu fara ósáttir úr þessari perlu okkar það er nokkuð sem við viljum alls ekki að eigi sér stað og biðst ég afsökunar á því. Hins vegar er nauðsynlegt að skýra þetta mál ögn.
Um langan aldur var netaveiði heimil í neðsla hluta Norðurár. Árið 1972 ganga bæirnir frá Munaðarnesi og niður í ós inn í veiðifélagið. Þá var ekki lengur leyft að leggja net á stangveiðitíma en bæir á þessu svæði máttu leggja net eftir að stangveiðitímabilinu lýkur, svo er enn. Umrædd net fundust sannarlega fyrir landi sem presturinn á staðnum hefur umráð yfir þó að í þessu tilviki hafi það verið maki hans sem lagði.
Þarna má sjá flotbúnaðinn á einu netanna í Kastalahylnum.
En skýringin á þessu er nokkuð einföld. Nokkrar jarðir, neðst við Norðurá eiga einnig land að Hvítá. Það gildir um umrædda jörð. Í Hvítá má leggja net frá og með 20. ágúst en í neðsta hluta Norðurár eftir að stangveiðitíma lýkur, eins og áður hefur komið fram. Ábúendur jarðarinnar sem um ræðir eru ný í þessu samfélagi, hafa aldrei áður lagt net. Þau töldu því að sama gilti um báðar árnar, þ.e. að net mætti leggja eftir 20. ágúst, í Norðurá og Hvítá.
Þetta var eins slysalegt og verið getur og má að hluta til atyrða veiðifélagið og stjórn þess fyrir að koma ekki þessum upplýsingum næganlega vel til skila til nýrra íbúa við ána. Von mín og trúa er sú að við sem búum við Norðurá lærum af þessu og stjórn veiðifélagsins verði vakandi fyrir því að upplýsa nýja íbúa um reglur sem gilda við ána. Ef um gamlagróna íbúa hefði verið að ræða hefði að sjálfsögðu öðruvísi verið tekið á málum og þau litin öðrum augum. Ég endurtek afsökunarbeiðni mína, fyrir hönd veiðifélagsins og vona að svona hlutir komi ekki fyrir aftur.“
Um þetta segir Kristján Páll: „Ég er ósáttur við þetta, það þarf einginn að segja mér að ábúendur á bænum hafi ekki vitað að ekki mætti leggja í einhverja bestu laxveiðiá landsins, veiðimönnum í Norðurá hefur verið vísað úr ánni fyrir brot á veiðireglum en netaveiðimenn sleppa með smá skammir, þetta er ekki sanngjant!“
Þráður með skoðanaskiptum um mál þetta er á www.svfr.is