Snemma beygist krókurinn
Allir vita að laxinn er hið mesta rándýr í hafinu, sveimar um uppsjávar og étur það sem hann ræður við og étur vel. Og eins og hjá öðrum rándýrum þá beygist snemma krókurinn.
Hér hefur nemandinn farið offari, enda enginn kennarinn! Mynd Jón Þór Júlíusson
Jú, veiðieðlið er í genunum því ekki hafa laxaseiði foreldra yfir sér til að kenna þeim listina að veiða til að lifa líkt og fuglar og spendýr. En í tilvikum laxfiska veitti kannski ekki af einhverjum reynsluboltum til að yfirsjá að allt fari nú vel fram í kennslustofunni og nemendur fari ekki offari. Eitthvað svoleiðis gæti manni dottið til hugar þegar skoðuð er myndin sem Jón Þór Júlíusson sendi okkur og var tekin í Stóru Laxá fyrr í sumar. Það er ekki ofsögum sagt, að með fálmurum, þá er hin græna Black Eyed Prawn stærri heldur en seiðið sem hugðist éta hana! Stubburinn slepp með skrekkinn í þetta skipti og vonandi að hann læri af reynslunni. Það er þó ekkert gefið í þeim efnum.