Batnandi útlit í Eyjafjarðará
Það er fallegt í Eyjafirðinum. Allar myndir: Heimir Óskarsson.
Stangaveiðimenn hafa eflaust flestir síðustu árin fylgst með niðursveiflu Eyjafjarðarár, a.m.k. með öðru eyranu eða auganu. Þessi fyrrum besta sjóbleikjuá landsins fór í hraða dýfu, svo mikla að hún var um tíma friðuð og sett í „gjörgæslu“. En nú virðast tímar vera bjartari.
Frá þessu er greint í nýrri úttekt á vefsíðu Veiðimálastofnunnar þar sem teknar eru saman rannsóknir á fiskistofnum árinnar síðustu árin. Eftir stóru uppgangsárin hrundi allt saman hratt. VMSt leiðir að því getum að sú dýfa kunni að stafa af hlýnun í gegnum árin, en augljóslega hefur slíkt mikil áhrif á lífríki vatnakerfa og þarfir hinna ýmsu tegunda eru ólíkar. Þó að það sé ekki nefnt sérstaklega þá hafa einnig margir orðið til að nefna að ofveiði kunni að hafa verið á efstu veiðisvæðum árinnar, ekki hvað síst með aukinni notkun á andstreymisveiði sem virðist geta mokað fiski upp viðstöðulítið séu skilyrði til þess fyrir hendi. Mikið var veitt af stóru hrygningarbleikjunni á efstu svæðunum á umræddum toppárum.
En allt um það. Í frétt VMSt segir m.a. eftirfarandi: „Nýverið kom út skýrsla Veiðimálastofnunar með niðurstöðum úr seiðamælingum í Eyjafjarðará haustið 2011. Rannsóknir Veiðimálastofnunar á ánni miða að því að fá mat á seiðaþéttleika og ástand seiða á vatnasvæði Eyjafjarðarár.
Sveinbjörn Daníelsson að veiðum í Eyjafjarðará.
Þær ná aftur til 1975 en hafa ekki verið samfelldar. Eyjafjarðará er ein besta bleikjuveiðiá landsins bæði hvað varðar fjölda og stærð veiddra fiska. Meðalveiðin í ánni á árunum frá 1986 til 2010 var 2132 bleikjur. Líkt og í flestum sjóbleikjuám á Íslandi hefur dregið úr veiðinni síðastliðinn áratug og hefur sú þróun verið sett í samband við hlýnandi veðurfar. Til að bregðast við minnkandi veiði í Eyjafjarðará hafa frá árinu 2008 verið takmarkanir á veiðar á annað agn en flugu og veiðimönnum gert að sleppa mest af þeirri bleikju sem þeir veiða. Vísbendingar eru um að þær ráðstafanir séu að bera árangur.“
Sjá meira af fréttinni á www.veidimal.is en þar má einnig sjá skýrsluna í heild sinni á PDF formi.