Við erum stödd í Borgarnesi og ökum af stað, stefnum í austur í átt að Norðurárdal, en áður en við erum komin svo langt, beygir afleggjari til vinstri rétt við bæinn Svignaskarð, sem er gamalt og merkt stórbýli. Á skiltinu stendur Langavatn og einnig er þar skilti er vísar til orlofshúsabyggðar BSRB og annað er vísar til veiðihúss SVFR fyrir Gljúfurá. Vegspottinn til veiðihússins greinist svo að segja strax frá þeim afleggjara sem við höfum nú tekið. Er rétt að vera ekkert að aka í hlað veiðihússins nema að við eigum sérstakt erindi þangað.....eins og t.d. til að veiða í þeirri bráðskemmtilegu og fallegu laxveiðiá. Sem þó má muna sinn fífil fegri í aflatölum!